Amerıkalyq tennısshi 20 jasynda jyldyń qorytyndy týrnıriniń chempıony atandy

ASTANA. KAZINFORM – Er-Rııadta (Saýd Arabııasy) WTA qorytyndy týrnırinde jekeleı synda jeńimpaz anyqtaldy.

Fınalda álemniń 3-raketkasy, 20 jastaǵy amerıkalyq Korı Gaýff pen reıtıngide 7-satyda turǵan qytaılyq, Parıj Olımpıadasynyń chempıony Chjen Tsınven bas júldeni sarapqa saldy.

Matchty qytaılyq tennısshi jaqsy bastady – 6:3. Ekinshi partııada Gaýff sátti oınaı bildi – 6:4.

Úshinshi, sheshýshi sette esep 5:4 bolǵanda, matchqa dop bergen Tsınven múlt ketti. Taı-breıkte amerıkalyq sportshy esesin jibergen joq – 7:6 (7:2).

Asa tartysty ótken kezdesý 3 saǵattan astam ýaqytqa sozyldy. Gaýff 5 eıspen birge 14 breık-poınttyń beseýin paıdalandy. Tsınvenniń esebinde 4 eıs, 5 breık (12 breık-poınt) bar.

Jartylaı fınalda álemniń 1-raketkasy, Belarýs ókili Arına Sobolenkony 7:6 (7:4), 6:3 esebimen joldan taıdyrǵan amerıkalyq tennısshi óz sporttyq jolynda alǵash ret WTA qorytyndy týrnırinde úzdik shyqty.

Fınalǵa deıin jetken Chjen Tsınven qazirgi kezde WTA Live reıtıngisinde amerıkalyq Djessıka Pegýla men qazaqstandyq Elena Rybakınany yǵystyryp, besinshi orynǵa kóterilip tur.

Eske sala keteıik, budan buryn Denıs Evseevtiń tartysty oıynda Helsınkı týrnıriniń fınalynan tys qalǵanyn jazǵan bolatynbyz.