Amerıkalyq sarapshylar «Qazaqmys» kompanııasyndaǵy ónerkásiptik qaýipsizdik júıesin baǵalaýǵa kiristi
ASTANA. KAZINFORM – «Qazaqmys» korporatsııasy AQSh-tyń JMJ Associates kompanııasymen birlesip óndiristegi qaýipsizdik júıesine tereń taldaý júrgizýdi qolǵa aldy. Jobanyń basty maqsaty – qyzmetkerlerdiń ómiri men densaýlyǵyn saqtaý mádenıetin korporatıvtik qundylyq deńgeıine kóterý.
«Qazaqmys» korporatsııasynda ónerkásiptik qaýipsizdik júıesin jahandyq taldaý bastaldy. Kompanııa barlyq óndiristik alańda eńbek qaýipsizdigi men eńbekti qorǵaý salasynda strategııalyq aýdıt júrgizý úshin JMJ Associates (AQSh) halyqaralyq konsaltıngtik uıymymen kelisimshartqa otyrdy.
«Qazaqmys korporatsııasy» JShS Basqarma tóraǵasy Nurahmet Nýrıev JMJ ókilderimen kezdesip, yntymaqtastyqtyń negizgi baǵyttaryn talqylady. Bul joba korporatsııanyń barlyq kásipornyn qamtıdy jáne basty mindeti – qaýipsizdik mádenıetin ornyqtyrý, ıaǵnı qyzmetkerlerdiń árqaısysy óz ómiri men áriptesteriniń amandyǵyn jeke jaýapkershiligi dep qabyldaýy.
– Biz bul aýdıtti tek rásimdik tekseris dep emes, kompanııanyń bolashaǵyna – qaýipsizdigi men turaqtylyǵyn qamtamasyz etýge jasalǵan strategııalyq ınvestıtsııa retinde qarastyramyz, – dep naqtylady Nurahmet Nýrıev.
JMJ Associates kompanııasy korporatıvtik mádenıet pen kóshbasshylyqty damytý salasynda 35 jyldan astam tájirıbege ıe. Qazaqstandaǵy bólimsheniń jetekshisi Renat Sálimǵalıevtiń aıtýynsha, joba eń aldymen jan-jaqty dıagnostıkadan bastalady. Bul kezeńde qyzmetkerlermen suhbat júrgizilip, óndiristik nysandarda baqylaý jasalyp, barlyq bıznes-úderis egjeı-tegjeıli taldanady. Mundaı tásil qaýipsizdik júıesiniń kúshti jáne álsiz jaqtaryn naqty anyqtaýǵa múmkindik beredi.
Jobanyń negizgi jumysy eki strategııalyq baǵytqa shoǵyrlanady:
Qaýipsizdikke jeke jaýapkershilikti qalyptastyrý. Bul baǵytta basshylar óz is-áreketimen úlgi kórsetip, ujymda ózara senim men ashyqtyq ahýalyn nyǵaıtý kózdelgen.
Qaýipsiz eńbek ortasyn qurý. Táýekel kózderin joıý, óndiris oryndarynda júıeli sheshimder engizý arqyly erejelerdi saqtaý tabıǵı ádetke aınalmaq.
– Joba birneshe jylǵa josparlanǵan. Biz barlyq deńgeıdegi qyzmetkerdi oqytamyz, ishki kóshbasshylar men qaýipsizdik ambassadorlaryn daıyndaımyz. Maqsatymyz – joba aıaqtalǵannan keıin de kompanııa ishinde qaýipsizdik mádenıetiniń damýyn qamtamasyz etý, – dedi Renat Sálimǵalıev.
JMJ Associates ókilderi bul seriktestik korporatsııa ishinde senim men ózara qurmetti arttyryp, óndiristegi jaraqattar men oqys oqıǵalar sanyn azaıtýǵa yqpal etetinine senimdi. Osylaısha qaýipsizdik – jumys úderisiniń ajyramas bóligine, ár qyzmetkerdiń sana-sezimine sińgen ádetke aınalmaq.
Nurahmet Nýrıev atap ótkendeı, jobaǵa basqarýdyń barlyq deńgeıi – qatardaǵy basshylardan bastap, top-menedjmentke deıin belsendi túrde tartylady.
– Aýdıt qorytyndysynda 2028–2029 jyldarǵa arnalǵan qaýipsizdik júıesin jetildirýdiń uzaqmerzimdi baǵdarlamasy ázirlenedi. Maqsatymyz – qaýipsizdik erejelerin saqtaý avtokólikte beldik taǵý sııaqty tabıǵı daǵdyǵa aınalýy, – dedi korporatsııa basshysy.
Jobanyń nátıjesinde kompanııada qaýipsizdik mádenıetiniń jańa deńgeıi qalyptasady. Bul baǵyttaǵy sharalar qyzmetkerlerdiń qatysýymen júzege asyrylady, al ishki kóshbasshylar men tálimgerler qaýipsiz jumys isteý tájirıbesin ujym ishinde nasıhattaıtyn negizgi tulǵalarǵa aınalady.
«Qazaqmys» osylaısha halyqaralyq standarttarǵa saı óndiristik qaýipsizdik júıesin nyǵaıtyp, turaqty jáne jaýapty óndiris mádenıetin qalyptastyrýdy maqsat etip otyr. Kompanııa basshylyǵynyń pikirinshe, qaýipsizdik – tek eńbek sharty emes, korporatıvtik tabystyń basty kepili.
Osyǵan deıin «Qazaqmys» kompanııasy geologııalyq barlaý jáne paıdaly qazbalardy óndirý salasyna tsıfrlyq tehnologııalardy engizý arqyly óndiris tıimdiligin jańa deńgeıge kóterip jatqany jaıly habarlaǵan bolatynbyz.