Amerıkalyq sarapshy AQSh pen Qytaı Ortalyq Azııadaǵy turaqtylyqqa ne sebepti múddeli ekenin túsindirdi
ASTANA. KAZINFORM — Hadson ınstıtýtynyń aǵa ǵylymı qyzmetkeri Ken Morııasý «Saılaý — 2026: qorytyndy jáne jańa saıası beles» atty sarapshylar alańynda Ortalyq Azııanyń álemdik geosaıasattaǵy mańyzy jáne Qazaqstandaǵy Quryltaı saılaýy jóninde pikir bildirdi.
— Qytaı men AQSh ekeýi de Ortalyq Azııany bolashaq úshin qajet etedi. Qytaı qazir teńiz saýda dálizderine óte táýeldi. Al olardy AQSh áskerı-teńiz kúshteri op-oǵaı buǵattap tastaı alady. Sondyqtan Qytaıǵa Úndi muhıtyna balama saýda joly kerek. Al Eýrazııadaǵy jerler, qubyr jelileri jáne Ortalyq Azııa arqyly ótetin temirjol júıelerine AQSh-tyń quryǵy jetpeıdi. AQSh-tyń da óz múddesi bar. Amerıka sırek kezdesetin paıdaly qazbalarǵa qol jetkizý turǵysynan Qytaıǵa táýeldilikten qutylǵysy keledi. Sóıtip, Qytaı men AQSh bir-birinen qashýǵa talpyna otyryp, Ortalyq Azııada qaıta kezdesip otyr, — dedi ol.
Sonymen birge, amerıkalyq maman Quryltaı saılaýy Qazaqstan úshin óte mańyzdy kún bolǵanyn atap ótti.
— Bul — jańa joldyń basy. Іshki saıası turaqtylyq Prezıdent Toqaevqa kópvektorly syrtqy saıasat júrgizýge múmkindik beredi, — dedi ol.
Aıta keteıik, buǵan deıin QSZI basshysy Quryltaı jumysy týraly pikir bildirgen edi.
