Amerıkalyq modýl Aı betine qondy

ASTANA. KAZINFORM – Firefly Aerospace kompanııasynyń amerıkalyq Blue Ghost qoný modýli Aı betine qondy. Tikeleı translıatsııa AQSh-tyń Aeronavtıka jáne ǵarysh keńistigin zertteý jónindegi ulttyq basqarmasynyń (NASA) saıtynda júrgizildi, dep habarlaıdy TASS.

Blue Ghost qoný modýli 15 qańtarda Florıda shtatyndaǵy Djon Kennedı atyndaǵy ǵarysh ortalyǵynan SpaceX kompanııasynyń Falcon-9 zymyranymen ushyrylǵan bolatyn. Aı betine qonýy Máskeý ýaqytymen 11:36-da júzege asty. Osylaısha, Jerden Aıǵa deıingi sapar ǵarysh apparaty úshin shamamen bir jarym aıǵa sozyldy.

Salmaǵy 155 kelige deıingi paıdaly júktemeni tasymaldaýǵa qabiletti qoný modýli Jerdiń serigine NASA-nyń 10 júgin jetkizdi. Bul júkter ártúrli ǵylymı eksperımentter júrgizý úshin qajet, sonyń ishinde Aı topyraǵyn jınaý jáne Aıdaǵy magnıt óristerin zertteý josparlanǵan. Buǵan qosa, modýl Jer magnıtosferasynyń rentgen sýretterin jasaıdy.

Modýl Aı betinde shamamen eki apta jumys isteıdi dep josparlanyp otyr.

Blue Ghost ótken jyldan beri Aıǵa jetken ekinshi amerıkalyq qoný apparaty boldy. 2024 jyldyń aqpanynda Nova-C modýli Aıǵa qonǵan edi, alaıda qoný kezinde bolǵan tehnıkalyq aqaýlardyń saldarynan onyń fýnktsıonaldyǵy shektelip, bar bolǵany bir aptadaı ǵana jumys istegen.

Buǵan deıin «Progress MS-30» kemesin alyp ushqan zymyrannyń Baıqońyrdan sátti ushyrylǵany habarlanǵan.