Amerıkalyq kovboılar qazaqtarmen kókpar oınaıdy
ASTANA. KAZINFORM – Elorda tórinde 8-14 qyrkúıek aralyǵynda ótetin V Dúnıejúzilik kóshpendiler oıynynda amerıkalyq kovboılar kókpardan saıysqa túsedi.
Bul týraly Týrızm jáne Sport mınıstri Ermek Marjyqpaev áıgili amerıkalyq kovboı Keısı Fıld pen kókpardan AQSh quramasynyń kapıtany Ledd Hoýellden quralǵan AQSh delegatsııasymen kezdesýinen keıin belgili boldy.
Kezdesý barysynda taraptar at sporty túrlerin damytýdy, eki elde kókpar men amerıkalyq rodeony keńinen nasıhattaýdy, sondaı-aq bıyl elimizde ótetin 5-shi Dúnıejúzilik kóshpendiler oıyndaryn talqylady.
Amerıkalyq delegatsııa 5-shi Dúnıejúzilik kóshpendiler oıyndarynyń kókpar jarysyna qatysýǵa daıyn ekenin jetkizdi. Buǵan deıin AQSh-tyń kókpardan ulttyq quramasy 2018 jáne 2022 jyldary Dúnıejúzilik kóshpendiler oıyndaryna qatysqan bolatyn.
«Kókpar – ejelgi kóshpendiler oıynynyń biri. Atalǵan sport túri birneshe júz jyldan beri oınalyp keledi. Árıne, bul – óte áserli oıyn. Qazaqstanda «Kókpar» federatsııasy jumys isteıdi. Elimizdiń kóptegen qalasy men aýylynda jyl saıyn kókpardan jarystar ótkizilip turady. Eń keıingi Dúnıejúzilik kóshpendiler oıyndarynda Qazaqstan kókparshylary bas júldeni jeńip aldy. Sondyqtan biz bıyl da sportshylarymyzǵa zor senim artamyz. Biz sizderdi osy sport túri boıynsha aldyńǵy qatarly komanda dep bilemiz. Sonymen qatar sizder Ortalyq Azııadaǵy kóshpeli halyqtarynyń at sporty oıyndaryna belsendi aralasyp, ony AQSh aýmaǵynda nasıhattap júrgenderińiz bizdi qýantady. AQSh komandasynyń kókparda óner kórsetýi este qalarlyq oqıǵa bolady dep oılaımyz», - dedi Ermek Marjyqpaev.
Kezdesý barysynda Týrızm jáne sport mınıstri AQSh-tan kelgen qonaqtardy 5-shi Dúnıejúzilik kóshpendiler oıyndarynyń keri sanaq taqtasyn iske qosý rásimine qatysýǵa shaqyrdy. Óz kezeginde delegatsııa ókilderi rodeo sportyn 5-shi Dúnıejúzilik kóshpendiler oıyndarynyń kórme qoıylymdary baǵdarlamasyna engizýdi usyndy.
