Amerıkalyq dıplomattar jumysty baǵalaýdyń jańa protsedýrasynan ótip jatyr
ASTANA. KAZINFORM – Amerıkalyq dıplomattardyń jumysyn baǵalaý júıesine engizilgen ózgerister olardy attestattaý obektıvtiligin qamtamasyz etýge múmkindik beredi, biraq dıplomattar múddelerin qorǵaý uıymdary narazylyq bildirdi, dep habarlaıdy ABC News.
Memlekettik departament laýazymdyq ósý, jalaqyny túzetý, jumystan shyǵarý jáne taǵy t.b týraly sheshim qabyldaý úshin qyzmetkerler arasynda jyl saıynǵy attestattaý júrgizedi. Jańa júıege sáıkes, attestattaýdy uıymdastyratyn basshylar óz qyzmetkerlerin sandyq shkala boıynsha baǵalaýǵa jáne jyldyq jumys ónimdiligi týraly esepterdi usynýǵa mindetti bolady.
Memlekettik departament ókilderiniń pikirinshe, bul Tramp ákimshiligi Memlekettik departamentti «jahandyq ózgeristerge ıkemdi jáne jedel jaýap beretin» etý úshin júzege asyryp jatqan aýqymdy reformanyń bir bóligi.
Alaıda dıplomattardyń múddelerin qorǵaıtyn kásibı uıym – Amerıkalyq dıplomatııalyq qyzmet qaýymdastyǵy (American Foreign Service Association, AFSA) úlken alańdaýshylyq bildirdi.
AFSA pikirinshe, baǵalaýdyń jańa formaty «mansapty anyqtaıtyn sheshimderdi ádiletsiz, ashyq emes jáne beıtarap ete alady».
Memlekettik departament basshylyǵy bul ózgeristerdiń jazalaýshy sıpatta ekenin joqqa shyǵaryp, olardyń basshylarǵa tıimdi mamandardy jáne qosymsha oqytýdy qajet etýi múmkin adamdardy anyqtaýǵa múmkindik beretinin aıtty.
Eske salsaq, Memlekettik departament álemdegi amerıkalyq dıplomattardy onlaın boljam almasýdan paıda tabý úshin qupııa úkimettik aqparatty paıdalanbaýǵa shaqyrdy.
