Amerıkalyq bıohaker ózin klondaǵanyn málimdedi
ASTANA. KAZINFORM — Amerıkalyq bıohaker jáne mıllıoner Braıan Djonson emdeýdiń jańa ádisterin synaqtan ótkizý jáne transplantatsııalaýǵa arnalǵan organdardy ósirý úshin óziniń náreste kezindegi «klonyn» jasady.
Qartaıýdy baıaýlatatý boıynsha eksperımentterimen tanymal joǵary tehnologııalar salasyndaǵy 48 jastaǵy kásipker taǵy da nazarǵa tústi. Jaqynda oǵan aýtoımmýndy gastrıt dıagnozy qoıylǵany týraly habarlanǵan soń ol ózin sátti «klondaǵanyn» málimdedi.
— Men ózimdi jańa ǵana klondadym…jańa týǵan náreste túrinde, — dep jazdy ol X-te.
Djonson ózi jasaǵan klon bolashaqta onyń «jeke qan donory» bolýy múmkin ekenin málimdedi. Onyń aıtýynsha, mundaı materıaldy sondaı-aq emdeýdiń jańa ádisterin synaý, medıtsınalyq tehnologııalardy ázirleý, transplantatsııalaý úshin organdardy ósirý jáne jas jasýshalardy engizý úshin paıdalanýǵa bolady.
Djonson óziniń klonynyń qazirgi ýaqytta zerthanalyq jaǵdaıda – Petrı ydysynda ekenin habarlady.
— Keıbir adamdar úshin bul qorqynyshty bolyp kórinýi múmkin… antıýtopııalyq bolashaqtan kelgen nárse sııaqty. Biraq basqalary muny medıtsına men densaýlyq saqtaýdyń sózsiz bolashaǵy retinde qabyldaıdy. Klınıkalyq synaqtar bul tehnologııany Parkınson aýrýy kezinde dofamın neırondaryn qalpyna keltirý, sondaı-aq júrek saýlyǵy men kórý qabiletin jaqsartý úshin qoldanyp jatyr, — dep jazdy bıohaker.
Braıan Djonson degen kim
Braıan Djonson — mı belsendiligin baqylaý jáne ólsheý qurylǵylaryn ázirleıtin kompanııanyń negizin qalaýshy jáne burynǵy bas dırektory. Braıan Djonson qatań ómir salty kiretin qartaıýǵa qarsy tájirıbelerimen erekshe tanymal boldy.
The Guardian jazýynsha, ol kún saıyn tańǵy saǵat 4:30–da oıanady, saǵat 11:00–ge deıin tamaqtanady jáne keshki saǵat 20:30–da uıyqtaıdy.
Fortune málimetinshe, Djonson kún saıyn tańǵy saǵat 05:00-te jıyrma shaqty preparat qabyldaıdy, shamamen 1977 «vegetarıandyq kalorııa» dıetasyn ustanady jáne bir saǵat boıy jattyǵýlar jasaıdy. Sodan keıin ol kók jaryqty bógeıtin kózildirik kıip, uıyqtaıdy.
Kásipker budan basqa «gendik terapııa» dep atalatyn protsedýradan ótti, qyzyl jaryq terapııasyn únemi qoldanady jáne kún saıyn denesiniń kóptegen bıologııalyq kórsetkishin muqııat baqylaıdy.
Budan buryn habarlanǵandaı, AQSh-ta salat japyraǵyndaǵy qaýipti parazıt ishek ınfektsııasynyń órshýine sebep boldy.
