Amerıkalyq baj salyǵy shveıtsarııalyq fermerlerge aýyr tıip otyr

ASTANA. KAZINFORM — AQSh prezıdenti Donald Tramptyń engizgen baj salyǵy shveıtsarııalyq sút ónerkásibine úlken soqqy boldy, dep habarlaıdy AZERTADJ.

Bul salyqtardan keıin eksport kólemi qysqaryp, shveıtsarııalyq fermerlerdiń qolyndaǵy sút kóbeıdi, sondyqtan baǵanyń arzandaý qaýpi paıda boldy.

Shveıtsarııada jyl saıyn 100 mıllıon kılogramm óńdelgen sút ónimderi AQSh naryǵyna eksporttalady, biraq 39%-dyq baj salyǵynan keıin bul naryqqa shyǵý qıynǵa soǵyp otyr. Bul jaǵdaı súttiń artyq qalýyna jáne baǵalardyń arzandaýyna ákelýi múmkin.

Sút sharýashylyǵy bıýrosy múmkindiginshe jyldam 2 myń tonna maı men 2 myń tonna qaımaqty eksporttaýdy josparlap otyr. Bolashaqta satyp alýshylar retinde Taıaý Shyǵys elderi nemese Túrkııa qarastyrylyp jatyr. Sút óndirýshilerge arnaıy qordan 11 mıllıon dollar kómek bólindi.

Osydan buryn AQSh prezıdenti Donald Tramp Úndistannan ákelinetin taýarlarǵa kedendik baj salyǵyn eki ese arttyrǵany habarlandy. 27 tamyzdan bastap AQSh-qa Úndistannan ımporttalatyn ónimderge 50% mólsherinde tarıf kúshine endi.