Amerıkalyq bapker Jánibek Álimhanulynyń qarapaıymdylyǵyna tánti boldy
ASTANA. KAZINFORM — Qazaqstandyq kásipqoı boksshy Jánibek Álimhanuly Nıý-Iorktegi áıgili Gleason’s Gym boks zalyna bardy. Amerıkalyq bapker Don Seksbı otandasymyzǵa joǵary baǵa berip, onyń qarapaıymdylyǵyna tánti bolǵanyn jetkizdi. Bul týraly INFORMSPORTS.KZ jazdy.
Amerıkalyq maman áleýmettik jelidegi paraqshasynda Jánibek Álimhanulymen birge túsken sýretin jarııalap, qazaqstandyq chempıonǵa jyly lebizin bildirdi.
— Gleason’s zalyna orta salmaqtaǵy WBO tujyrymy boıynsha álem chempıony Jánibek Álimhanuly keldi. Ol — naǵyz chempıon ári óte qarapaıym jas jigit. Oǵan bar jaqsylyqty tileımiz. Qudaı oǵan tek jaqsylyq násip etsin, — dep jazdy Don Seksbı Instagram paraqshasynda.
Aıta keteıik, Nıý-Iorktiń Brýklın aýdanynda ornalasqan Gleason’s Gym — álemdegi eń tanymal boks zaldarynyń biri. Munda ár jyldary Muhammed Álı, Maık Taıson sekildi aty ańyzǵa aınalǵan boksshylar jattyǵý ótkizgen.
Jánibek Álimhanuly qazirgi ýaqytta kásibı mansabyndaǵy jańa kezeńge daıyndalyp jatyr. Qazaqstandyq bylǵary qolǵap sheberi orta salmaqtan ekinshi orta salmaq dárejesine aýysýdy josparlaǵan.
Aldaǵy jekpe-jegi 2027 jyldyń 23 qańtaryna belgilengen. Jánibek Danııanyń Horsens qalasyndaǵy Forum Horsens arenasynda jergilikti boksshy ıAkob Bankpen kezdesedi dep kútilýde.
12 raýndqa josparlanǵan aıqasta ekinshi orta salmaqtaǵy WBO tujyrymy boıynsha bos turǵan álem chempıony ataǵy sarapqa salynady.
Jánibek Álimhanuly kásipqoı rıngte 17 jekpe-jek ótkizip, barlyǵynda jeńiske jetken. Onyń 12-si nokaýtpen aıaqtalǵan. Al qarsylasy ıAkob Banktiń enshisinde 20 jeńis bar, onyń 11-in merziminen buryn aıaqtaǵan.
Bul kezdesý qazaqstandyq boksshy úshin ekinshi salmaq dárejesinde álem chempıony atanýǵa múmkindik bermek.
Buǵan deıin qazaqstandyq kásipqoı boksshy Jánibek Álimhanuly (17-0, 12 KO) aldaǵy chempıondyq jekpe-jegine qatysty málimdeme jasap, eki salmaq dárejesinde álem chempıony atanýǵa nıetti ekenin jetkizgen bolatyn.
