Amerıkalyq áıel jol apatynan keıin qashyp ketken maımyldy atyp tastady
ASTANA. KAZINFORM – Amerıkada áıel ótken aptada Mıssısıpı jolynda júk kóligi aýdarylyp qalǵannan keıin ishinen qashyp ketken zerthanalyq maımyldardyń birin atyp óltirdi. Ol balalarynyń qaýipsizdigi úshin qoryqqanyn aıtty, dep habarlaıdy ABC News.
Djessıka Bond Fergıýsonnyń baıandaýynsha, 16 jastaǵy uly jeksenbi kúni tańerteń úıleriniń aýlasynda júgirip júrgen maımyldy kórgen. Ol tóseginen turyp, tapanshasy men uıaly telefonyn alyp, syrtqa shyǵyp, maımyldy shamamen 18 metr qashyqtyqta kórgen.
Bondtyń aıtýynsha, oǵan jáne basqa turǵyndarǵa maımyldar juqtyratyn aýrýlar týraly eskertilgen, sondyqtan ol tapanshadan oq atqan.
- Men balalaryn qorǵaý úshin kez kelgen ananyń áreketin jasadym. Men ony atyp tastadym, ol sol jerde turdy, sodan keıin taǵy attym, ol artqa sheginip, qulady, - dedi ol.
Djasper okrýginiń sherıf keńsesi áleýmettik jelilerde úı ıesiniń jeksenbi kúni tańerteń óz ýchaskesinen maımyldardyń birin tapqanyn rastady, biraq keńsede oqıǵanyń egjeı-tegjeıi týraly aqparaty joq ekenin málimdedi. Sherıf keńsesiniń málimetinshe, maımyldy Mıssısıpı shtatynyń Jabaıy tabıǵat, balyq sharýashylyǵy jáne saıabaqtar departamenti alyp ketti.
Buǵan deıin Mıssısıpı shtatynyń bıligi jol apatynan keıin qashyp ketken zerthanalyq maımyldy izdeý jumysyn júrgizip jatqanyn jazǵan bolatynbyz.
Aqparatqa sáıkes, Lýızıana shtatyndaǵy Týleın ýnıversıtetiniń Ulttyq bıomedıtsınalyq ortalyǵynan kelgen rezýs-makakalar S gepatıti jáne Covid-19 sııaqty birneshe vırýsty juqtyrǵan, sondyqtan adamdar úshin qaýip tóndirýi múmkin.