Amerıkalyq alpınıst Taıvandaǵy eń bıik ǵımaratqa arqansyz órmelep shyqty

ASTANA. KAZINFORM — Amerıkalyq alpınıst Aleks Honnold Taıvandaǵy eń bıik «Taipei 101» ǵımaratyna qaýipsizdik arqanynsyz ekstremaldy túrde órmelep shyǵyp, záýlim nysandy baǵyndyrdy, dep habarlaıdy Reuters.

Ol 508 metrlik (101 qabatty) ǵımaratqa 91 mınýtta órmelep shyqqan. Onyń bıikke órleýin myńdaǵan kórermen tamashalady. Alpınıstiń bıikke kóterilýi Netflix arqyly tikeleı kórsetildi jáne oǵan ǵımarat basshylyǵy men qala bıligi ruqsat berdi.

Honnold ǵımarattyń bir buryshyna shyǵyp, aıaǵyn L-tárizdi etip, kishkene shyǵyńqy jerlerge tiredi. Keıbir jerlerde qasbettiń dekoratıvti elementterin aınalyp ótýge týra keldi.

Órmeleýdiń eń qıyn bóligi ǵımaratqa erekshe sılýet beretin «bambýk qoraptary» dep atalatyn ortańǵy bóliktiń 64 qabaty boldy. Bul aýmaq árqaısysy 8 deńgeıden turatyn segiz segmentke bólingen: tik kóteriletin aýmaqtarda balkondar bar, ol bul jerlerde qysqa úzilis jasady.

Alpınıst kóterilgennen keıin muny «Taıbeıdi kórýdiń tamasha tásili» dep atap, buǵan deıin ǵımaratqa zańsyz órmeleýdi oılaǵanyn, biraq uıymdaǵy adamdarǵa qurmet retinde bul ıdeıadan bas tartqanyn atap ótti.

Aıta keteıik, «Taipei 101» 2004-2010 jyldar aralyǵynda álemdegi eń bıik ǵımarat boldy. Bul tıtýl qazirgi ýaqytta Dýbaıdaǵy Býrdj Halıfaǵa tıesili. 2004 jyly Taıvandaǵy záýlim ǵımaratqa «frantsýzdyq órmekshi adam» degen atpen tanymal alpınıst Alen Robert kóterildi. Alaıda ol qaýipsizdik toryn qoldandy.

Osyǵan deıin atyraýlyq alpınıst 20 kúnde eki alyp shyńdy eńsergeni týraly jazdyq. Sondaı-aq qazaqstandyq Anar Býrasheva álemdegi eń bıik 7 shyńdy baǵyndyrǵanyn jarııaladyq.