Amerıkada túrmeden qashqandarǵa qatysty aqparatqa 50 myń dollar syıaqy taǵaıyndaldy
ASTANA. QazAqparat - Kalıfornııa polıtsııasy juma kúni qatań rejimdegi túrmeden qashyp ketken úsh sottalýshyny tabýǵa jergilikti turǵyndardan kómek surady, dep habarlaıdy Bı-Bı-Sı agenttigi.
Polıtseılerdiń aıtýynsha, qashqyndar qarýlanǵan, sol sebepti qaýipti. Qylmyskerlerdiń turaqtaǵan meken-jaıy týraly aqparatqa 50 myń dollar syıaqy taǵaıyndalǵan.
Quqyq qorǵaý organdarynyń málimetinde, qashqyndardyń ekeýi vetnamdyq qylmystyq toptyń múshesi ekendigi, adam ólimi boıynsha jazasyn ótep jatqandyǵy atap ótilgen. Al úshinshisi adam urlaý jáne azaptaý boıynsha aıyptalǵan.
Qashqyndar kameralarynyń jýan temir qorshaýyn aramen kesip tastap syrtqa shyǵyp, baılanys týnneline ótken. Budan soń bes qabatty ǵımarattyń ústinen kıimderi men oramal tiliginen jasalǵan arqanmen jerge túsken.
Jergilikti polıtsııa ókiliniń málimdeýinshe, okrýg túrmelerinde tutqyndardyń qashyp ketýi tek 20 jyl buryn tirkelipti.
Tergeýshiler qashý úshin qylmyskerler aldyn ala muqııat daıyndalǵan dep málimdeýde.
