Amerıkada sottalǵan Qazaqstan azamattary jazasyn elimizde óteý múmkindigin alady - Senat
ASTANA. QazAqparat - Búgin Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysy ótti. Onda depýtattar «Qylmystyq jazany shetelde óteý týraly amerıkaaralyq konventsııany ratıfıkatsııalaý týraly» zań jobasyn talqylady.
Konventsııaǵa sáıkes, bir qatysýshy memlekette ekinshi qatysýshy memlekettiń azamatyna qatysty shyǵarylǵan úkimdi sottalǵan adam ózi azamaty bolyp tabylatyn memlekette óteı alatyn múmkindikter qarastyrylady. Bul rette sottalǵan adamdy bir memleketten ekinshi memleketke berý úkim shyǵarǵan memlekettiń suraý salýy, qabyldaýshy memlekettiń suraý salýy nemese sottalǵan azamattyń óziniń suraý salýy negizinde júrgiziledi. Ol úshin sottalǵandardy berý týraly suraý salýdy ortalyq organdar qaraýǵa tıis nemese ondaı organdar bolmaǵan kezde konsýldyq, dıplomatııalyq arnalar arqyly qaralýǵa tıis.
«Zań jobasyna sáıkes, biz Amerıka elderinde sottalǵan azamattarymyzdy qaıtaryp, qalǵan jazany elimizde óteýge múmkindik bere alamyz. Biraq, bul úshin birqatar talap bar. Birinshiden, sottalǵannyń ózi sony qalaýy qajet, onyń erki bolmasa májbúrlep ákelinbeıdi. Ekinshi talap - eki jaqtyń Qazaqstannyń da, Amerıka elderiniń de tıisti organdarynyń kelisimi kerek. Munymen qatar, sottalǵannyń is-áreketi eki elde de qylmys bolyp tanylýy tıis. Budan bólek, ólim jazasy bolmaýy qajet jáne qalǵan jazanyń merzimi keminde alty aı bolýy shart», - dedi QR Bas prokýror orynbasary Jaqyp Asanov.
Onyń aıtýynsha, konventsııada sottalǵandardy berýden bas tartatyn jaǵdaılar da qarastyrylady. Tutastaı alǵanda, konventsııaǵa Amerıka qurylyǵynyń 16 eli qosylǵan. Budan keıingi kezeńderde úsh memleket qosylmaq. Osylaısha, Qazaqstan bir konventsııany qabyldaý arqyly bir mezgilde 19 elmen qarym-qatynas ornata alady degen sóz. Aıta keterligi, sońǵy tórt jylda Qazaqstan týra osyndaı 19 shartqa qol qoıǵan bolsa, búgingi kúni 28 elmen kelissózder júrgizilip jaty eken.
Zań jobasy palatanyń aldaǵy jalpy otyrysyna shyǵarylatyn bolady.
