Amerıkada kúnine bes balanyń ajaly ata-anasynan keledi eken
ASTANA. 23 aqpan. QazAqparat - Ekonomıkasy damyǵan AQSh jas jetkinshekterdiń ólimi boıynsha kósh bastap tur. AQSh-ta kún saıyn bes balanyń ajaly ezgeniń nemese ata-anasynyń salǵyrt qaraýynan kóz jumady eken. Bul jaıynda amerıkalyq «Child Help» uıymy resmı statıstıkaǵa silteme jasap, dabyl qaqty.
muslim.kz saıtynyń jazýynsha, RF bıliginiń málimdeýinshe, Tehas shtatynyń Lora men Alan Shatto esimdi turǵyndary asyrap alǵan úsh jastaǵy Maksım Kýzmın men onyń baýyry Kırıll otbasyndaǵy zorlyq-zombylyqtan kóz jumǵan. AQSh-tyń quqyqqorǵaý organdary men qamqorshylary tergeý aıaqtalǵansha túsinikteme berýden bas tartyp otyr. Ázirge belgilisi: aǵaıyndylar Shatto úıiniń aýlasynda oınap júrgende Maksı Kýzmın esinen tanyp qalǵan. Bul kezde asyrap alǵan ata-anasy olardyń qasynda bolmaǵan. Makıs Kýzmın Reseıden asyrap alǵan AQSh-taǵy 60 myń balanyń arasyndaǵy ómirden erte ketken 20-shy bala ekenin aıta ketý kerek.
AQSh-ta ata-analardyń bala aldyndaǵy jaýapkershiligine qatysty statıstıkalyq esep 1998 jyldan beri ashyq júrgizilip keledi. Statıstıkalyq esepke júginsek, ata-analardyń qatygezdiginen nemese salǵyrttyǵynan kóz jumatyn balalardyń sany kún saıyn kóbeıýde. 1998 jyly eresekterdiń kinásinen kún saıyn úsh bala kóz jumsa, bul kórsetkish 2003 jyly tórtke jetken. Al 2010 jyldan beri kúnine bes bala ata-ananyń kesirinen arǵy dúnıege attanatyn kórinedi.
Zorlyq-zombylyqtyń nátıjesinde kóz jumatyn balalardyń sanyn paıyzǵa shaqqanda - 17,6%, al jas jetkinshekterge ata-ananyń salǵyrt qaraýy men qatygezdiginen qaıtys bolatyndardyń sany 78% paıyzdy quraıdy. Ata-ananyń kesirinen kóz jumǵan balalardyń 80 paıyzy tórt jasqa deıingi búldirshinder bolyp tabylady. «Child Help» uıymy anyqtaǵandaı, ómirden erte ozǵan balalardyń jartysynan kóbisiniń neden qaza tapqany belgisiz kúıinde qalǵan.
Reseıdegi jaǵdaıǵa kelsek, óziniń týǵan ata-anasynyń nemese asyrap alǵan áke-sheshesiniń kesirinen qaza tapqan balalarǵa qatysty statıstıkalyq esep joq bolyp shyqty. «Otbasy quqyǵy úshin» dep atalatyn uıymnyń deregine qaraǵanda, bala ólimine qatysty naqty málimetti 2005 jyly bas prokýratýra keltirgen eken: 2000-2005 jyldar aralyǵynda ata-ananyń qolynan 1,086 myń bala qaıtys bolǵan.
