Amerıkada eń tanymal terrorıst Ýnabomber qaıtys boldy
ASTANA. QazAqparat - Ol Garvardta bilim alǵan výnderkınd edi. Otyzdan asqanda bárinen bas tartyp, ormanda elden jyraqta ómir súrdi jáne terrorıstik jolǵa tústi. Teodor Kachınskı 81 jasynda Soltústik Karolına túrmesinde qaıtys boldy, dep habarlaıdy QazAqparat Euronews agenttigine silteme jasap.
Unabomber degen atpen belgili Teodor Djon Kachınskı 1996 jyly poshta arqyly jappaı bomba jiberdi degen aıyppen qamaýǵa alynǵan.
Sot ony ómir boıyna bas bostandyǵynan aıyrdy.
Onyń jibergen bombasynan 3 adam kóz jumǵan, 20 shaqty adam jaraqat aldy.
Kachınskıı 20 jylǵa jýyq polıtsııaǵa ustatpaı, qashyp júrdi. Kezinde ol izdeýde júrgen eń tanymal, ákki qylmysker sanalǵan.
Ol mektepte matematıkaǵa júırik výnderkınd boldy, 16 jasynda Garvard ýnıversıtetine tústi.
Mıchıgan ýnıversıtetinde matematıka boıynsha PhD dárejesin aldy. 25 jasynda Berklı ýnıversıtetinde sabaq bere bastady, biraq eki jyldan keıin jumystan ketti.
70-shi jyldardyń basynda ol Lınkolnge (Montana shtaty) kóship kelip, elektr qýaty jáne sýy joq lashyqta turyp jatty.
Kóp uzamaı Kachınskıı «ónerkásip pen qurylys aınaladaǵy jabaıy tabıǵatty joıyp jatqanyna» yza bolyp, bulaı tynysh ómir súre almaıtynyn túsindi.
Sóıtip 1978 jyldan 1995 jylǵa deıin ýnıversıtetter men áýe kompanııalaryna 16 bomba paketin jiberdi.
17 jyldan keıin ustalýyna qylmyskerdiń ózi sebepshi boldy.
Ol Washington Post jáne New York Times gazetterinen «Ónerkásiptik qoǵam jáne onyń bolashaǵy» atty manıfesin jarııalaýdy talap etken. Oǵan FBI men AQSh Bas prokýrory kelisim berdi.
Manıfest jarııalanǵannan keıin qylmyskerdiń izine túsý múmkin boldy.
FBI Kachınskııge Unabom laqap atyn paıdalandy (Unabom - ýnıversıtet jáne avıakompanııalardy bombalaýshy).
Keıinirek baspasózdiń arqasynda laqap at Unabomber sózine aınaldy.
Kachınskııdiń advokattary ólim jazasyna kespes úshin ony aqyl-esi durys emes dep aqtaýǵa tyrysty. Al Kachınskııdiń ózi ózin jyndy sanaǵan joq.
Nátıjesinde Kachınskıı esi durys dep tanylyp, kinásin moıyndap, ómir boıyna bas bostandyǵynan aıyryldy.
