Amerıkada ekinshi adamǵa shoshqanyń júregi salyndy
Merılend ýnıversıtetinde ekinshi ret adamǵa genetıkalyq túrlendirilgen shoshqa júregi salyndy. Buǵan deıingi naýqas mundaı júrekpen eki aı ómir súrgen, dep habarlaıdy QazAqparat agenttigi DW basylymyna silteme jasap.
AQSh-taǵy Merılend ýnıversıteti, Medıtsına ortalyǵynyń mamandary tarıhta ekinshi ret adamǵa genetıkalyq túrlendirilgen shoshqanyń júregin sátti ornalastyrdy.
«Amerıkalyq ÁTK ardageri, 58 jastaǵy naýqas otadan keıin ózin jaqsy sezinedi, qosymsha qurylǵylarsyz dem alady. Al oǵan ornalastyrylǵan júrek «syrtqy qurylǵylardyń kómeginsiz, qalypty jumys istep tur», - delingen 22 qyrkúıekte ýnıversıtet saıtyna salynǵan aqparatta.
Fosette buǵan deıin júrek-qan tamyr aýrýy men ishki qan ketý bolǵandyqtan adamnyń donor júregin qabyldaýǵa qabiletsiz dep tanyldy.
«Sońǵy úmitim – shoshqa júregi. Qalaı bolǵanda da, endi múmkindigim bar», - dedi ol ota aldynda.
Fosett aǵzasy donor músheni qabyldamaı qoımas úshin arnaıy preparattar men antıdene iship jatyr.
Buǵan deıin osyndaı ota dál osy medıtsına ortalyǵynda 2022 jyly jasalǵan. 57 jastaǵy naýqas Devıd Bennett «kóptegen faktor, onyń ishinde densaýlyǵynyń nasharlyǵyna» baılanysty eki aıdan keıin qaıtys boldy, dep málimdedi medıtsına qyzmetkerleri.
Qazir AQSh-tyń ózinde genetıkalyq túrlendirilgen janýarlardyń aǵzasyn ózine qondyrýǵa 100 myńnan astam adam kezekte tur. Mamandar osy arqyly donorlyq múshe jetispeý máselesin sheshýdi kózdeıdi. Buǵan deıin Nıý-Iork ýnıversıteti janyndaǵy Langon Medıtsına ortalyǵynda mıy ólgen adamǵa shoshqa búıregi salyndy. Ol adam aǵzasynda 61 kún jumys istedi.
