Amerıkada eki poshtashy hattardy ıelerine jetkizbegeni úshin sottalýy múmkin
ASTANA. QazAqparat - Aıyptalyp otyrǵan poshta qyzmetkeri qarasha aıynda Nıý-Iork qalasynyń Kvıns bóligine aýystyrylǵan. Alaıda, bul baǵytta jetkizilýi tıis quttyqtaý hattar men syılyqtar kóp bolyp shyǵady. Jańa qyzmetker óz mindetin atqarýdyń ornyna hattardy qapqa salyp qoqys jáshigine tastap otyrǵan, dep habarlaıdy newsru.com saıty.
Qazir 25 jastaǵy Danıel Darbıdiń isi sotta qaralýda. Jaýapsyz qyzmetker «hattardy joıdy jáne olardy der kezinde jetkizbedi» dep aıyptalyp otyr. Óıtkeni, onyń qoqysqa tastaǵan hattar men sálemdeme qoraptary eki kúnnen keıin tabylǵan. Poshtashy keıbir sálemdemelerdiń ishindegisin alyp qoıǵany belgili boldy, dep jazady Nıý Iork post gazeti.
Osy kezde Brýklın soty da hatpen jiberilgen bank kartalaryn jáne 100 myń AQSh dollaryn urlaǵan taǵy bir poshtashynyń isin qarap jatyr.
Djeıms Heıden hattardy ashyp, ishindegi syılyq kartalaryn alyp qoıǵanyn moıyndap otyr. Onyń qylmysy Visa kartasyn ulyna jibergen kelinshektiń shaǵymynan keıin ashylǵan. Polıtsııa kelinshek kórsetken kartanyń nómirin teksergende poshtashy ondaǵy aqshaǵa dúkennen zat satyp alǵanyn anyqtap, dúkenderdiń birinen beınebaqylaý kamerasyndaǵy aıǵaq vıdeony tapqan. Polıtsııa keıin onyń úıin tintý barysynda osyndaı bank kartalary toly ámııan tapty.
Amerıka poshtasynyń eki qyzmetkerine zań boıynsha 5 jylǵa bas bostandyǵynan aıyrý jáne 250 myń dollar aıyppul salý qarastyrylǵan. Darbı 50 myń dollar kepilmen bosatyldy, Haıdenge 75 myń dollar kepil berý mindetteldi. Aıyptalýshylar men olardyń advokattary túsindirme berýden bas tartyp otyr.
