Amerıkada eki bala telefonyn alyp qoıǵany úshin anasyna renjip, kólikpen úıden qashyp ketken

Florıda polıtsııasy túnde tasjolda urlanǵan kólikti toqtatyp, ishinen 11 jasar qyz ben onyń 10 jasar inisin kórip ań-tań boldy. Rýlde sol 10 jasar bala bolǵan. Keıin belgili bolǵany - balalar elektrondy qurylǵylaryn tartyp alǵany úshin anasyna renjip, úıinen qashyp ketken, dep habarlaıdy QazAqparat BBC jańalyqtaryna silteme jasap. 

Alachýa okrýginiń sherıf keńsesi habarlaǵandaı, birneshe kún buryn balalardyń anasy aq sedan kóligi urlanǵanyn aıtyp, polıtsııaǵa júgingen. 

Sóıtip tańǵy saǵat 4-te trassadan urlanǵan kólikti kórgende birden toqtatqan. 

«Qyzyq bolǵanda kólikten 10 jasar júrgizýshi men onyń ápkesi tústi», — deıdi polıtsııa.

Osy ýaqyt ishinde olar Port Nort qalasynan Alachýaǵa deıin 300 shaqyrymnan astam joldy júrip ótken. 

Belgili bolǵandaı, eki bala da elektrondy qurylǵylaryn tartyp alǵany úshin anasyna qatty renjigen. Anasy shekten tys kóp qoldanasyńdar dep ashýlanǵan kórinedi. 

«Degenmen bul balalar turmystyq zorlyq-zombylyq qurbany boldy nemese úıinde ata-anasy qorlyq kórsetti deýge eshqandaı negiz joq. Bizdiń detektıvter anasymen uzaq áńgimelesip, balalaryn tárbıeleý úshin bar kúsh-jigerin salyp jatqanyn jáne búkil usynystardy tyńdaýǵa, usynylǵan barlyq kómekti qabyldaýǵa daıyn ekenin anyqtady» delingen polıtsııa málimdemesinde.  

Polıtsııa qashqyn balalardy kólikpen birge áıelge qaıtardy. 

Florıdada 15 jasta oqý júrgizýshi kýáligin alýǵa bolady, biraq tolyq lıtsenzııa alý úshin 18 jasqa deıin kútý kerek.