Amerıkada 75 jyl birge ǵumyr keshken erli-zaıyptylar aralaryna bir kún salyp dúnıeden ozdy
ASTANA. QazAqparat - Amerıkandyq erli-zaıyptylar Djannett pen Aleksandr Tochko 75 jyl birge ǵumyr keship, arasy bir kún aıyrmashylyqpen ómirden ótti, dep habarlady ABC News.
Olar 1919 jyly Stemfordta (Konnektıkýt shtaty) dúnıege kelgen. Ekeýi de polshalyq bosqyndardyń urpaqtary. 1940 jyly otaý qurǵan.
Aleksandr Tochko golfpen áýestengen, bul sport túrimen tipti kún saıyn aınalysqan. Jýyrda ol qulap qalyp, jambasyn syndyryp alǵan bolatyn, dedi uly Rıchard Tochko. Eriniń densaýlyǵy nasharlaı túskende, jubaıy da ózin jaısyz sezine bastaǵan.
Eri aldymen 17 maýsymda dúnıeden ótti, «Ol ózi qalaǵandaı anamnyń qolynda kóz jumdy», - dep málimdedi qyzdary Eımı-Tochko-Kýshman.
«Kórdiń be, óziń qalaǵandaı boldy. Meniń qolymda dúnıeden ozdyń. Seni súıemin. Meni kút, kóp uzamaı janyńa baramyn», - degen anasynyń sózin keltirdi Tochko-Kýshman. Kelesi kúni Djanett Tochko da baqılyq boldy.
