Amerıkada 40-qa jýyq jolaýshy keme bortynda norovırýs dertin juqtyrdy
ASTANA. QazAqparat - Kalıfornııa jaǵalaýyna týrǵa shyqqan Amerıkanyń Crown Princess krýızdik laıneriniń bortynda 40-qa jýyq jolaýshy norovırýs dertin juqtyrdy. Bul týraly kemege ıe kompanııanyń ókilderi habarlaǵan, dep aqparattandyrdy ITAR-TASS.
CBS telearnasynyń málimetteri boıynsha, San-Frantsıskoda keme toqtatylyp, 3 myń jolaýshyny juqpaly jáne tez taraıtyn aýrýdan qorǵaý boıynsha qajetti sharalar júrgizilgen. Ári qaraı laıner belgilengen kestege sáıkes, Kalıfornııanyń Santa-Barbara qalasyna qaraı ketti. Atap óteıik, norovırýs álemdegi eń tez juǵatyn vırýs bolyp sanalady. Jyldamdyǵy sonshalyq tipti ǵalymdar ony «vırýstar arasyndaǵy «Ferrarı» dep ataǵan. Ony juqtyrǵandar sırek ólimge ushyraıdy. Degenmen aýrý óte aýyr ótedi, adamnyń júregi aınyp, dıareıa men tumaýdyń belgileri baıqalady. Ázirge norovırýs ınfektsııasynan emdeý tásilderi joq. Bul aýrý ózdiginen úshinshi táýlikte jazylady. Dárigerler ony juqtyrǵan adamǵa bar bolǵany jatyp, suıyqtyqty kóbirek ishýge keńes beredi.
