Amerıkada 280 dollarǵa satylatyn oqýlyqty qazaqstandyqtar tegin oqıdy

ASTANA. QazAqparat - Amerıkalyq stýdentter 280 dollarǵa satyp alatyn oqýlyqty qazaqstandyqtar tegin oqıdy. Bul týraly búgin «Jańa gýmanıtarlyq bilim. Qazaq tilindegi 100 jańa oqýlyq» jobasy aıasynda jaryq kórgen oqýlyqtardy Elbasy Nursultan Nazarbaevqa tanystyrý barysynda Ulttyq aýdarma bıýrosynyń atqarýshy dırektory Raýan Kenjehanuly aıtty, dep habarlaıdy QazAqparat.

«Bul deńgeıdegi bir oqýlyqty  qurastyryp, basýǵa daıyndaý quny 500  myńnan 3 mıllıon dollarǵa deıin jetedi. Sondyqtan da oqýlyqtardyń baǵasy ádette óte joǵary. Mysaly, biz aýdarǵan professor Menkıýdiń «Ekonomıks» atty oqýlyǵyn amerıkalyq stýdentter 280 dollarǵa satyp alady. Onyń ústine, oqýlyqty ózge tilge aýdaryp, basýǵa  da avtorlar qatań baqylaý jasaıdy», - dep atap ótti ol.

Onyń aıtýynsha, atalǵan jaıtty eskere otyryp aýdarma jumysyna elimizdegi irgeli oqý oryndary, gýmanıtarlyq baǵyttaǵy ǵylymı-zertteý ortalyqtarynyń mamandaryn keńinen tartýǵa kúsh salynǵan. Aýdarmany meılinshe sapaly shyǵarý úshin jumysqa tájirıbeli aýdarmashylar men joǵary oqý oryndarynyń ustazdary shaqyrylyp, ǵylymı redaktsııa jasaýǵa elimizdiń belgili ǵalymdary, ádebı redaktsııaǵa qarymdy qalamgerler, bilikti redaktorlar men baspagerler tartylǵan.

«Qazir bul jumysqa 200-ge tarta maman qatysýda. Sondaı-aq, ǵylymı aýdarmasy jolǵa qoıylǵan elderdiń tájirıbesi muqııat zertteldi. Іrgeli aýdarma tehnologııasynyń biri dúnıejúziniń 181 myńnan asa aýdarmashysy qoldanatyn arnaıy tuǵyrnama usyldy», - dedi Raýan Kenjehanuly.

Aıta keteıik, Astanadaǵy Nazarbaev ortalyǵynda «Qazaq tilindegi 100 jańa oqýlyq» jobasy aıasynda aýdarylǵan alǵashqy kitaptardyń tanystyrylymy ótip jatyr. Saltanatty sharaǵa QR Prezıdenti Nursultan Nazarbaev qatysýda.

Jıynda sóz sóılegen Ulttyq aýdarma bıýrosynyń atqarýshy dırektory Raýan Kenjehanuly qazaq tiline aýdarylǵan 18 oqýlyqtyń jalpy taralymy 47 mıllıonnan asatyndyǵyn aıtty.