Amerıka úshin mańyzdy kún: Tramp túrli eldermen saýda kelisimine qol qoıdy
ASTANA. KAZINFORM — AQSh birneshe elmen saýda kelisimine qol qoıdy, sondaı-aq Donald Tramptyń 1 tamyzǵa belgilengen baj salyǵyn engizý merzimi aldynda Úndistan men Brazılııaǵa baj salyǵyn engizdi, dep habarlaıdy Kazinform tilshisi.
— 1 tamyzǵa belgilengen merzim ózgerissiz jáne uzartylmaıdy. Amerıka úshin mańyzdy kún! , — dep jazdy ol Truth Social-da.
Ońtústik Koreıa
Ońtústik Koreıa AQSh ekonomıkasyna 350 mlrd dollar ınvestıtsııa quıyp, amerıkalyq kompanııalardan 100 mlrd dollar somasyna energııa resýrstaryn satyp alady. Bul eki el arasyndaǵy saýda kelisiminiń nátıjesi. Donald Tramp bul jańalyqpen Truth Social áleýmettik jelisindegi paraqshasynda bólisti.
— Ońtústik Koreıa úshin 15% kedendik bajy týraly kelistik. Amerıkaǵa baj salynbaıdy. Sondaı-aq Ońtústik Koreıanyń Qurama Shtattarmen saýda jasaýǵa tolyq ashyq bolýy jáne olar amerıkalyq ónimderdi, sonyń ishinde jeńil, júk kólikteri, aýylsharýashylyq tehnıkalaryn jáne t. b. qabyldaıtyny týraly kelisildi, — dep jazdy Tramp.
Budan basqa, Aq úı basshysynyń aıtýynsha, Seýl de qomaqty ınvestıtsııa bólýge kelisti, onyń kólemin taraptar eki apta ishinde Ońtústik Koreıa prezıdenti Lı Chje Men Vashıngtonǵa kelgen kezde jarııalaıdy.
Taıland jáne Kambodja
Sondaı-aq AQSh-tyń Kambodja jáne Taılandpen saýda kelisimderin jasasqany týraly belgili boldy.
Mámileniń egjeı-tegjeıi áli keltirilgen joq.
Taıland pen Kambodja arasyndaǵy beıbit kelisimge qol qoıylǵan soń AQSh prezıdenti óziniń deldaldyq áreketteri eki el arasyndaǵy qarýly qaqtyǵys kezinde «mıllıondaǵan adamnyń» ólimine jol bermegenin habarlady.
Gonkongtyń South China Morning Post gazetiniń jazýynsha, Tramp saýda kelissózin eki eldi kelissóz ústeline otyrǵyzý úshin «shoqpar» retinde paıdalanyp, Vashıngton shaıqastar jalǵasyp jatqanda eki elmen de saýda kelisimine qol jetkize almaıdy dep qorqytqan.
Pákistan
AQSh sondaı-aq Pákistanmen el aýmaǵynda iri munaı ken oryndaryn birlesip ıgerýdi qamtıtyn saýda kelisimine qol qoıdy.
— Biz jańa ǵana Pákistanmen kelisim jasadyq, oǵan sáıkes AQSh pen Pákistan bul eldiń orasan zor munaı qoryn birlesip ıgeredi. Qazir bul seriktestikke jetekshilik etetin munaı kompanııasyn tańdap jatyrmyz. Kim biledi, bir kúni olar Úndistanǵa munaı satatyn shyǵar, — dep jazdy Aq úı basshysy Truth Social-daǵy paraqshasynda.
Úndistanǵa qarsy baj
Bir kún buryn Donald Tramp Úndistanǵa 1 tamyzdan bastap 25% kóleminde baj salyǵyn engizetinin málimdedi.
— Úndistan bizdiń dosymyz bolsa da, biz olarmen kóp jyldar boıy salystyrmaly túrde az bıznes júrgizdik, óıtkeni olardyń tarıfteri tym joǵary, álemdegi eń joǵarynyń biri jáne olar kez kelgen eldiń eń aýyr jáne jıirkenishti monetarlyq emes saýda kedergilerine ıe», — dep jazdy Donald Tramp Truth áleýmettik jelisinde. https://truthsocial.com/@realDonaldTrump/posts/114942106248731470
AQSh Saýda ókili Djeımıson Grır dúısenbide CNBC-ke Úndistanmen qıyn saýda kelisimine qol jetkizý úshin eki el arasynda kóbirek kelissóz júrgizý qajet ekenin málimdedi.
Brazılııada qarsy baj
Donald Tramp Brazılııadan keletin taýarlar men qyzmetterge baj salyǵyn 50 paıyzǵa deıin arttyratyn jarlyqqa qol qoıdy.
Buǵan deıin 10 paıyzdyq mólsherleme kúshinde bolatyn.
— Brazılııadan AQSh-tyń kedendik aýmaǵyna ákelinetin taýarlarǵa zańǵa sáıkes 40% qosymsha advalorlyq baj salyǵy salynady, — delingen jarlyqta.
Baj salyǵyn arttyrý Trampty belsendi qoldaǵan Brazılııanyń burynǵy prezıdenti Jaır Bolsonarýǵa qatysty jalǵasyp jatqan sotqa baılanysty júzege asyrylyp jatyr. Vashıngtonnyń nusqasy boıynsha, sot protsesi «adam quqyqtaryn buzatyn» «saıası astarly» qadam.
Bolsonarý 2023 jyldyń qańtarynda Brazılııa astanasynda tártipsizdikterdi týdyrýǵa kómektesti degen kúdikke ilindi.
Brazılııa prezıdenti Lýla da Sılva brazılııalyq taýarlarǵa baj salyǵyn engizý Qurama Shtattar ekonomıkasynyń ózine keri áser etýi múmkin ekenin eskertti.
Brazılııa Parlamenti Federaldyq Senatynyń múshesi Karlýs Vıana AQSh-tyń brazılııalyq ımportqa tarıfteri BRIKS qaýymdastyǵynyń kúsheıýinen qorqýmen baılanysty bolǵasyn Bolsonarýdy qoldaý syltaý ekenin málimdedi.
Eske sala ketsek, AQSh prezıdenti Donald Tramp Brazılııadan keletin taýarlar men qyzmetterge salynatyn kedendik baj salyǵyn 50 paıyzǵa deıin arttyrýdy kózdeıtin jarlyqqa qol qoıdy.
Buǵan deıin Donald Tramp AQSh 1 tamyzǵa belgilengen 14-ten astam elge kedendik baj salyǵyn engizýdi keıinge qaldyrmaıtynyn eskertken.