Amerıka kıno juldyzdary JI jasaǵan aktrısadan qorqyp qaldy
ASTANA. KAZINFORM – Gollıvýd kınojuldyzdary men kásibı uıymdar jasandy ıntellekt arqyly jasalǵan alǵashqy aktrısalardyń biriniń paıda bolýyna ashýly reaktsııa bildirdi, dep habarlaıdy VVS.
Olar naǵyz akterlerdiń jumysy negizinde úıretilgen mundaı kompıýterlik modelder búgingi kınoındýstrııaǵa qaýip tóndiredi dep alańdaýshylyq bildirdi.
Tıllı Norvýdtyń áleýmettik jelidegi sýretterine qarap, ony qarapaıym jas aktrısa dep oılaýyńyz múmkin. Biraq shyn máninde, onyń ártúrli dekoratsııalardaǵy sýretteri men komedııalyq sıýjetteri tolyǵymen jasandy ıntellekt arqyly jasalǵan. Ony jasaýshylar qara shashty áıeldi «kórshini eske túsiretin boıjetken» dep sıpattaıdy.
— Meni II jaratsa da, meniń qazirgi sezimderim óte shynaıy. Men kelesi nárseni asyǵa kútemin, — dep jazdy Tıllıdiń avtorlary onyń atynan.
Olar akterlik agenttiktermen JI aktrısasynyń kıno jáne telejobalarǵa qatysýy týraly kelissóz júrgizip jatqanyn qosyp ótti.
Tıllıdiń paıda bolýyna Nıderland aktrısasy jáne komık Elın van der Velden men onyń Particle6 kompanııasy jol saldy. Habarlamalarǵa qaraǵanda, ol Norvýdtyń «kelesi Skarlett Iohansson» bolǵanyn qalaıdy. Van der Velden sonymen qatar Gollıvýd stýdııalary men akterlik agenttikter JI salasynda jarııasyn jumys istep jatqanyn málimdedi jáne aldaǵy aılarda osy tehnologııany qoldanatyn iri jobalar týraly jarııalaýǵa ýáde berdi.
Tıllı Norvýdty Gollıvýdta dushpandyqpen qarsy aldy. Kınoakterler gıldııasy jáne tele jáne radıoártister federatsııasy (SAG-AFTRA) osy másele boıynsha arnaıy málimdeme jasady.
— [Norvýd] — aktrısa emes, ol kóptegen kásibı oryndaýshylardyń shyǵarmalary negizinde daıyndalǵan, kompıýterlik baǵdarlama arqyly jasalǵan keıipker, — delingen habarlamada. Onyń jumysta qoldanýǵa bolatyn ómirlik tájirıbesi joq. Onda ýaıym joq. Bizdiń baqylaýlarymyzǵa qaraǵanda, aýdıtorııany adamnyń qatysýynsyz kompıýter jasaǵan mazmun qyzyqtyrmaıdy, — delingen habarlamada.
Sońǵy ýaqytta amerıkalyq oıyn-saýyq ındýstrııasy jasandy ıntellekttiń damýyna, onyń ishinde kompıýterlik algorıtmder naqty akterler, rejısserler jáne sýretshilerdiń jumysynyń negizinde úıretiletinine qatysty erekshe alańdaýshylyq bildirip otyr.
Eki jyl buryn Gollıvýdta ereýil bastalyp, televızııalyq jne kınokompanııalar ıeleri kásipqoılardy JI tóndirip turǵan qaýipten qorǵaýǵa ýáde berdi. SAG-AFTRA óz málimdemesinde Tıllı Norvýdty paıdalaný sol kezdegi kelisimderdi buzýy múmkin ekenin atap ótti.
Kásipodaq málimdemesinde Norvýdtyń paıda bolýy eshqandaı máseleni sheshpeıdi, kerisinshe jańasyn jasaıdy — «akterlerdi jumystan aıyratyny, oryndaýshylardyń ál-aýqatyna qaýip tóndiretini jáne adamnyń óner salasyndaǵy jetistikterin tómendetetini» aıtylǵan.
Akterlar ne aıtyp jatyr
Gollıvýd juldyzdary bul máselege qatysty qattyraq pikir bildirdi.
«Amerıkandyq bálish» fılmderi jáne «Qyzǵylt sary — maýsym hıti», «Matreshka» jáne «Pokerfeıs» serıaldarynyń juldyzy, aktrısa Natasha Lıonn Tıllı Norvýdpen jumys isteýge kelisetin kez kelgen adamǵa boıkot jarııalaýǵa shaqyrdy.
— Eger qandaı da bir akterlik agenttik muny jasasa, barlyq kásibı qaýymdastyqtar olarǵa boıkot jarııalaýy kerek, — dep málimdedi Lıonn.
Taǵy bir tanymal aktrısa Emılı Blant Variety podkastynda JI aktrısasynyń paıda bolýy ony shynymen qorqytqanyn moıyndady.
— Bul shynymen JI ma? O, Qudaıym, onda bárimizdiń sońymyz jetti. Bul shynymen de óte-óte qorqynyshty. Qurmetti akterlik agenttikter, bulaı etpeńiz! Ótinemin, toqtatyńyz! Bizdiń adamı qarym-qatynasymyzdy úzbeńiz, — dedi ol Tıllı Norvýdtyń beıneleriniń birin kórgen soń.
Biraq Gollıvýdtyń basty juldyzdarynyń biri Výppı Goldberg The View telebaǵdarlamasynda kórermender shynaıy akterler men kompıýter jasaǵan akterler arasyndaǵy aıyrmashylyqty árqashan aıyra alatynyn aıtty.
Aıta ketelik, Memleket basshysy jańa tehnologııany adamzat ıgiligine paıdalanýdy basty mindet retinde atady.