Amerıka ǵalymdary zaǵıptarǵa arnalǵan planshet jasady
ASTANA. QazAqparat - Mıchıgan ýnıversıtetiniń ınjenerleri kózi kórmeıtin adamdarǵa arnap planshet jasap shyqty.
Braıl shrıftimen jazylǵan elektrondy kitaptar óte qymbat turady. Óıtkeni ol elektr qozǵaltqyshpen kóteriletin plastık shtıfterdi paıdalanady. Bul qurylǵynyń aqparatty berý jyldamdyǵy da baıaý. Ónertapqyshtar bul tehnologııany jetildirip, jaqsartýdy usynýda. Mıchıgan ýnıversıtetiniń ınjenerleri kózi kórmeıtin adamdarǵa arnap bederli áripterdiń bir betin tolyq beretin tolyq ekrandy qurylǵy jasaý jolyn oılap tapty, dep jazady reseılik vesti.ru.
Sılı O'Modreın men onyń áriptesteri beti jumsaq dıspleıde Braıl árpin tompaıtyp shyǵaratyn suıyq pen aýany paıdalanbaq. Árbir bederge keletin suıyq kólemi rettelip otyrady.
Bederde áripter ǵana emes túrli kúrdeli pishin, sýret jáne grafıkalar da kórsetiledi.
Planshettiń alǵashqy nusqasy ázirge óte iri, túrli qubyrlar jalǵanǵan. Onyń sońǵy nusqasynda qubyrlardy mıkroarnalar almastyrady.
Qazir zaǵıptar mátindi sózge aınaldyratyn baǵdarlamany qoldanady. Alaıda kózi kórmeıtin jandar beıneni, formýlany basqa da sózben sıpattalmaıtyn kúrdeli pishinderdi tek kitaptan ǵana oqı alady.
Eger ónertapqyshtar barlyq nyshandardy ekranǵa shyǵaratyn arzan planshet jasap shyqsa, zaǵıptarǵa matematıka jáne basqa da ǵylymdardy ıgerýge múmkindik týady.
Qazir ınjenerler óz qurylǵylary 1000 dollar shamasynda bolady dep otyr. 2013 jyly qolǵa alynǵan joba bıyl qyrkúıek aıynda aıaqtalady.
