«Amerıka daýysy» qyzmetkerleri men kásipodaqtar Tramp ákimshiligin sotqa berdi

ASTANA. KAZINFORM – «Amerıka daýysy» qyzmetkerleri men olardyń kásipodaqtary juma kúni AQSh prezıdenti Donald Tramp ákimshiligine qarsy sotqa shaǵym túsirdi, dep habarlaıdy Sınhýa.

Olar AQSh qarjylandyratyn buqaralyq aqparat quraldarynyń jabylýy Birinshi túzetýmen kepildik berilgen quqyqtaryn buzady dep málimdeıdi.

Nıý-Iorktegi AQSh okrýgtik sotyna berilgen shaǵymda jaýapkerler retinde AQSh-tyń Jahandyq buqaralyq aqparat quraldary agenttigi (USAGM), onyń ýaqytsha dırektory Vıktor Morales jáne arnaıy keńesshi Karı Leık atalǵan.

Shaǵymdanýshylardyń qatarynda «Amerıka daýysy» jýrnalısteri, «Shekarasyz reporterler» jáne birneshe kásipodaqtar bar. Olar Donald Tramp ákimshiliginiń 1 300-den astam qyzmetkerdi aqysyz demalysqa jiberip, birneshe jańalyq resýrstarynyń qarjylandyrýyn qysqartýy Konstıtýtsııaǵa qaıshy ári zańsyz áreket boldy dep sanaıdy.

Shaǵym USAGM-niń jabylýy týraly sheshimdi joıýdy talap etedi. Bul agenttik «Amerıka daýysy» men basqa da BAQ-ty, sonyń ishinde «Azat Eýropa/Azattyq radıosy» jáne «Azat Azııa radıosyn» qarjylandyrady.

Buǵan deıin Tramp jeti federaldy agenttikte, sonyń ishinde «Azattyq radıosy» men «Amerıka daýysyna» jaýapty USAGM-de qysqartý júrgizýdi buıyrǵany habarlanǵan.