AMC Fight Nights prezıdenti Shavkat Rahmonovtyń UFC chempıony bolý múmkindigin baǵalady
ASTANA. QazAqparat - AMC Fight Nights League prezıdenti Kamıl Gadjıev Youtube-tegi Kamil Time arnasynda qazaqstandyq jekpe-jek faıteri Shavkat Rahmonov týraly pikir bildirdi, dep habarlaıdy QazAqparat Sports.kz portalyna silteme jasap.
«Sóz joq. Qatelespesem, bul onyń on jetinshi jeńisi jáne ol osy on jeti jeńisiniń barlyǵyn merziminen buryn aıaqtady. Ol UFC chempıondyq beldigi jáne UFC chempıondyq beldigimen baılanysty talqylanatyn tulǵalardyń biri ekeni sózsiz. Oǵan chempıondyq ataq buıyra ma, joq pa? Bul - oılanaıtyn jáıt. Sebebi bul dıvızıon óte myqty. Onda Leon Edvards, Kamarý Ýsman, Kolbı Kovıngton, Hamzat Chımaev sııaqty ataqty jekpe-jek sheberleri bar. Olardyń arasyna Shavkat ta qosyldy. Eger Shavkat aýyr salmaqta óner kórsetetin bolsa, oǵan tıtýl úshin jekpe-jek baıaǵyda berilip keter edi dep oılaımyn. Biraq munda bári birshama kúrdelirek. Sondyqtan, qazaqstandyq jankúıerlerge úndeý joldaımyn – Dana Ýaıtqa pikirlerińizdi joldańyz! Óıtkeni Shavkat óte ádemi kele jatyr, ádemi kórinedi, jaqsy sóıleıdi. Jalpy, onyń boıynda chempıondyq belbeý úshin kúreske qajettiniń bári bar. Biraq, taǵy da aıtamyn, másele ol sııaqty myqtylardyń taǵy úsh-tórteýi bar ekendiginde. Olardyń qaısysy myqty? Men bul Shavkat bolady dep oılaımyn. Ony aldaǵy jyly biletin bolamyz», - deıdi Gadjıev.
