Ambýlatorlyq qyzmettiń júktemesi joǵary bolyp tur - Mahabbat Bekbosynova
NUR-SULTAN. QazAqparat - Ambýlatorlyq qyzmettiń júktemesi joǵary bolyp tur . Bul týraly «Ulttyq ǵylymı kardıohırýrgııa ortalyǵy» AQ basqarmasy tóraǵasynyń birinshi orynbasary Mahabbat Bekbosynova aıtty, dep habarlaıdy QazAqparat tilshisi.
«Qazirgi ýaqytta sımptomsyz jáne aýrý jeńil ótip jatqan patsıentterdiń kúndelikti statıstıkasyn júrgizip otyrmyz. 15 myńǵa jýyq adam sımpomsyz, 2 myńǵa jýyq aýrýdyń jeńil túri ótip jatqan patsıent retinde baǵalanǵan. Ambýlatorlyq býynnyń jiti baqylaýy barysynda patsıentterdiń shamamen 3 paıyzy statsıonarǵa aýystyrylady. Mundaı málimetter kún saıyn túsedi», - dedi ol.
Onyń atap ótýinshe, aýrýdyń alǵashqy belgileri baıqalǵan kezde tirkelgen medıtsınalyq mekemege júginý qajet. Qazirgi ýaqytta medıtsınalyq mekememen baılanysýǵa múmkindik beretin baılanys nómirleri barlyq jerde bar.
«Árıne, ambýlatorlyq qyzmette belgili bir problemalardyń bar ekendigi jasyryn emes. Biz ambýlatorlyq býynda tek shuǵyl qaraýlardy ǵana qaldyryp, barlyq josparly keńes berýlerdi toqtatýdy ótindik. Óıtkeni, búginde ambýlatorlyq qyzmettiń júktemesi joǵary bolyp tur. Kardıolog retinde kúretamyr qysymy nemese júrek tusynda aýyrsyný bolǵan kezde keńes qajet ekendigin túsinemin. Biraq, ol úshin arnaıy utqyr top qurylǵan. Buǵan qosa, COVID-19-ben aınalysatyn utqyr top ta bul aqparatty medıtsınalyq-sanıtarlyq alǵashqy kómekke bere alady», - dedi Mahabbat Bekbosynova.
Onyń aıtýynsha, qazirgi ýaqytta jedel medıtsınalyq kómek qyzmetiniń de júktemesi tym úlken bolyp tur. Bul qyzmetke bolmashy sımptomy bar patsıentter de óte kóp qońyraý shalady. Sonyń saldarynan shuǵyl kómek qajet etetin naýqastarǵa der ýaqytynda járdem berilmeı jatady. Buǵan qosa aptasyna 24 saǵat jumys isteıtin ambýlatorlyq qyzmet, ıaǵnı, medıtsınalyq-sanıtarlyq alǵashqy kómek deńgeıinde kezekshi brıgadalar qurý qajet.
«Osyǵan baılanysty jedel medıtsınalyq qyzmet óte aýyr sanattaǵy aýrýlar úshin shuǵyl jaǵdaıda jumys isteýi tıis. Menińshe, osy sharalardy qabyldaý elimizdegi ahýaldy turaqtandyrýǵa múmkindik beredi», - dedi ol.
