Amazonııanyń tropıkalyq ormandary janyp jatyr
NUR-SULTAN. QazAqparat – Brazılııa Federatıvtik Respýblıkasynyń tropıkalyq ormandarynda myńdaǵan órt oshaǵy jalyndap jatyr, dep habarlaıdy QazAqparat BBC-ge silteme jasap.
Brazılııa ǵarysh agenttiginiń deregine sáıkes, bıyl Amazonııa tropıkalyq ormandaryndaǵy órttiń sany rekordtyq deńgeıge jetken. Ásirese, Brazılııadaǵy Roraıma, Akrı, Rondonııa, Amazonas jáne Matý-Grosý-dý-Sýl shtattary qatty zardap shekken.
Brazılııa ulttyq ǵarysh zertteý ınstıtýtynyń spýtnıktik derekteri kórsetip otyrǵandaı, órttiń sany byltyrǵydan 85% artqan.
Resmı málimetterge sáıkes, Brazılııada 2019 jyldyń segiz aıynda 75 myń orman órti shyqsa, bul kórsetkish 2018 jyly 39 759 bolǵan.
Órtten eldiń soltústigi qatty zardap shekken. Atap aıtqanda, órt sany soltústik Roraımada 141%, Akrı batys shtatynda - 138%, Rondonııa batys shtatynda - 115%, soltústik-batystaǵy Amazonas shtatynda 81% kóbeıgen.
Brazılııanyń iri shtattarynyń biri Amazonasta tótenshe jaǵdaı jarııalandy. Ońtústik-batystaǵy Matý-Grosý-dý-Sýl shtatynda órt kólemi 114% artqan.
Ádette, orman órti qurǵaq kezeńde, shildeden qazanǵa deıin jalǵasady. Órt tabıǵı sebepterden, mysaly, naızaǵaı razrıadynan, sondaı-aq jer ýchaskelerin jaıylymdar men egis alqaptary úshin tazalaıtyn sharýalar men aǵash kesýshilerdiń kesirinen tutanýy múmkin.
Belsendilerdiń aıtýynsha, Brazılııa prezıdenti Jaır Bolsonarýdyń sózderi ormandy ońdy-soldy otaýdy kóbeıtip otyr. Óz kezeginde jahandyq jylyný teorııasyn burynnan moıyndamaıtyn Jaır Bolsonarý úkimettik emes uıymdardy óziniń úkimetine zııan keltirý úshin ormandy ádeıi órtep otyr dep aıyptady. Keıinirek ol úkimettiń jalynmen kúreske resýrstar jetpeı jatqanyn aıtty.
