Amazon Web Services ortalyqtaryna BAÁ men Bahreınde órt saldarynan zaqym keldi
ASTANA. KAZINFORM - BAÁ men Bahreındegi AWS ortalyqtarynda elektrmen jabdyqtaýda úzilister tirkeldi. Bul áskerı qaqtyǵys kezinde jahandyq bultty alpaýyttyń derekter ortalyǵyna jasalǵan alǵashqy soqqy bolyp otyr, dep habarlaıdy Anadoly.
Oqıǵa bultty servıster jumysynyń ýaqytsha toqtaýyna yqpal etip, tsıfrlyq qaýipsizdik salasyndaǵy sarapshylardyń alańdaýshylyǵyn týdyrdy.
— Eki aımaǵymyzda belgili bir zattardyń túsýinen elektrmen jabdyqtaýda úzilister boldy, sodan keıin elektr qýaty sóndi, — delingen Amazon kompanııasynyń resmı málimdemesinde.
Bul rette kompanııa yqtımal syrtqy shabýyldarmen baılanystyń bar-joǵyn naqtylamady.
Sarapshy Shanaka Anselm Perera ortalyqqa áskerı qaqtyǵys saldarynan fızıkalyq zaqym kelgenin málimdedi.
— Zymyran nemese ushqyshsyz apparat synyqtaryn Amazon «nysan» dep jikteıdi, óıtkeni korporatıvtik termınologııada mundaı jaǵdaılarǵa qatysty stsenarııler joq. Bul soǵys kezinde tikeleı soqqydan jahandyq bultty alpaýyttyń derekterdi óńdeý ortalyǵy zardap shekken tarıhtaǵy alǵashqy jaǵdaı, — dedi ol.
SODİMER tsıfrlyq qaýipsizdik zertteýler ortalyǵynyń negizin qalaýshy, professor Levent Eraslan tsıfrlyq ınfraqurylymǵa jasalatyn shabýyldardyń strategııalyq mańyzyn atap ótti.
Onyń aıtýynsha, Irannyń shabýyly tek áskerı baǵytta ǵana emes, tsıfrlyq ınfraqurylym arqyly da júzege asyrylyp jatyr.
— Búginde derekterdi óńdeý ortalyqtary, bultty júıeler men jeliler energetıkalyq nysandar nemese áskerı bazalarmen birdeı mańyzǵa ıe. Derekterdi baqylaý — zamanaýı soǵystyń negizgi maıdandarynyń biri. Mundaı áreketterdi AQSh-tyń tehnologııalyq ınfraqurylymyna qarsy kıberqýattyń belgisi retinde qarastyrý qajet. Tsıfrlyq dáýirde derekter men ınfraqurylymdy baqylaý — áskerı is-qımyldardyń kózge kórinbeıtin, biraq asa mańyzdy maıdandarynyń biri, — dedi professor.
Buǵan deıin AQSh Qarýly kúshteri Tegerannyń ıadrolyq jáne zymyrandyq áleýetin joıýǵa baǵyttalǵan Iran aýmaǵyndaǵy aýqymdy operatsııalaryn jalǵastyryp jatqany habarlanǵan bolatyn. AQSh prezıdenti Donald Tramp operatsııanyń basty maqsaty — Irannyń ıadrolyq qarý jasaýyna jol bermeý jáne Eýropa men AQSh-qa tónetin qaterdi beıtaraptandyrý ekenin málimdedi.
Osyǵan deıin Izraıl men AQSh birlesip Iranǵa qarsy operatsııa bastaǵany týraly jazdyq.