Amazon smartfondar naryǵyna jańa Transformer qurylǵysymen oralady
ASTANA. KAZINFORM — Amazon kompanııasy Fire Phone gadjetiniń sátsizdiginen keıin 10 jyldan astam ýaqyt ótken soń, Transformer kodtyq ataýymen jańa smartfon shyǵarýdy josparlap otyr, dep habarlaıdy Reuters.
Qurylǵy Alexa daýystyq kómekshisimen biriktirilip, Amazon ónimderi men kontenti úshin jeke arnaǵa aınalady.
Amazon kompanııasynyń alǵashqy smartfony Fire Phone 2014 jyly tanystyryldy. Onyń negizin qalaýshy Djeff Bezostyń Apple jáne Samsung kompanııalarymen básekelesýge tyrysqanyna qaramastan, tómen satylymǵa baılanysty bir jyldan keıin toqtatyldy.
Derekkózderdiń málimetinshe, jańa Transformer telefonyn Amazon kompanııasynyń qurylǵylar men qyzmetter bólimi jasap jatyr. Ol Amazon.com dúkenderine, Prime Video, Prime Music jáne Grubhub sııaqty seriktesterden taǵamǵa tapsyrys berýge qol jetkizýdi jeńildetetin, Alexa-men sınhrondalatyn jekelendirilgen mobıldi qurylǵy retinde jasalǵan.
Jobany ótken jyly serpindi gadjetterdi ázirleý úshin qurylǵan ZeroOne toby basqarady. Top jetekshisi Djeı Allard buryn Microsoft korporatsııasynda jumys istegen jáne Zune men Xbox-ty qurýǵa qatysqan.
Jańa smartfon jasandy ıntellektini keńinen paıdalanady dep josparlanyp otyr. Bul dástúrli qoldanbalar dúkenderine táýeldilikti azaıtýy múmkin. Alexa negizgi fýnktsııaǵa aınalady, biraq qurylǵynyń negizgi operatsııalyq júıesi bolmaıdy.
Jobanyń shyǵý kúni men qarjylyq málimetteri týraly aqparat áli jarııalanǵan joq. Amazon ókilderi bul jóninde aıtýdy jón kórmedi.
Aıta keteıik, aqpanda Amazon satylym boıynsha Walmart-ty basyp ozdy.