Amazon satylym boıynsha Walmart-ty basyp ozdy

ASTANA. KAZINFORM – 2025 jyly Amazon satylym boıynsha Walmart-ty basyp ozyp, álemdegi eń iri kompanııaǵa aınaldy, dep habarlaıdy The Hill. 

Walmart esebine sáıkes, sońǵy qarjy jylynda onyń kirisi 713,2 mlrd dollardy quraǵan, al elektrondyq kommertsııa alyby Amazon-nyń kirisi 716,9 mlrd dollar boldy.

Amazon kompanııasynyń ótken jylǵy kirisiniń basym bóligi – shamamen 464 mlrd dollar onlaın satylymdardan, al Walmart satylymynyń 90%-y dástúrli dúkenderden tústi.

Sońǵy onjyldyqta tutynýshylar jaı dúkenderden emes, ınternet arqyly jıi satyp alatyn bolǵandyqtan Amazon kompanııasynyń kirisi Walmart kompanııasymen salystyrǵanda on esege jýyq ósti.

Bul túbegeıli ózgerister Amazon ótken aıda jasandy ıntellektti damytý boıynsha baǵdarlamasynyń aıasynda 16 myń jumys ornyn qysqartatynyn jarııalaǵannan keıin oryn aldy.

Amazon kompanııany 1994 jyly Djeff Bezos qurǵannan beri ósti. Qazir onyń birneshe enshiles kompanııasy bar, sonyń ishinde Amazon Web Services, Ring, Twitch strımıngtik platformasy, Amazon Prime Video, Amazon MGM Studios jáne basqalary. Qańtar aıynda Amazon óziniń enshiles kompanııalarynyń biri Whole Foods Market-ke nazar aýdaryp, Amazon Fresh jáne Amazon Go dúkenderin jabatynyn jarııalady.

Buǵan deıin Amazon atom elektr stantsııasynyń josparlarymen bólisetinin jazdyq.