Amazon-nyń ondaǵan myń qyzmetkeri jumyssyz qalýy múmkin
ASTANA. KAZINFORM - Amazon korporatıvti qyzmetkerler sanyn shamamen 30 myń adamǵa azaıtý jospary aıasynda kelesi aptada-aq jappaı qysqartý sharasynyń ekinshi keńezeńin iske qospaq, dep habarlaıdy Reuters.
Qazan aıynda kompanııa keńse qyzmetkerleriniń shamamen 14 myńyn jumystan shyǵarǵan edi — bul jarııalanǵan qysqartý josparynyń teń jartysyna jýyq. Endi aldaǵy jańa tolqyn da aýqymy jaǵynan soǵan shamalas bolýy múmkin ári seısenbi, 27 qańtardan bastalýy yqtımal.
Qysqartý Amazon Web Services (AWS), bólshek saýda baǵyty, Prime Video, sondaı-aq kadr saıasatyna jaýapty People Experience and Technology departamentin qamtıdy degen boljam bar.
Kompanııa qazan aıyndaǵy qysqartýlardy jasandy ıntellektige negizdelgen sheshimderdi jedel engizýmen baılanystyrǵan bolatyn. Amazon sol kezde qazirgi II býynyn ınternettiń paıda bolýynan bergi eń qarqyndy tehnologııalyq serpilis dep atap, onyń bıznesti buryn-sońdy bolmaǵan jyldamdyqpen damytýǵa múmkindik beretinin málimdegen.
Alaıda keıinirek Amazon bas dırektory Endı Djessı sarapshylarǵa qysqartýlardyń qarjylyq qıyndyqtarmen de, tikeleı II damýyna da qatysy joq ekenin aıtty. Onyń sózinshe, negizgi másele korporatıvtik mádenıet pen artyq bıýrokratııada jatyr. Kompanııada basqarý satylary kóbeıip, shtat shamadan tys ulǵaıyp ketken.
Buǵan deıin, 2025 jyly-aq, Djessı jasandy ıntellekt arqyly tıimdilikti arttyrý aqyry kompanııadaǵy keńse qyzmetkerleriniń azaıýyna alyp keletinin eskertken edi. Qazir kóptegen iri korporatsııalar baǵdarlamalyq qamtamasyz etý men kúndelikti protsesterdi avtomattandyrý úshin II-di belsendi paıdalanyp, shyǵyndy qysqartýǵa ári adam eńbegine táýeldilikti azaıtýǵa umtylyp otyr.
Jeltoqsanda Amazon jyl saıynǵy AWS konferentsııasynda jańa II úlgilerin tanystyrdy. Josparlanyp otyrǵan 30 myń qyzmetkerdi qysqartý Amazon-nyń jalpy 1,58 mıllıondyq shtatynyń 2 paıyzyna da jetpegenimen, korporatıvtik personaldyń shamamen 10 paıyzyna teń bolmaq. Kompanııa qyzmetkerleriniń basym bóligi logıstıkalyq ortalyqtar men qoımalarda eńbek etedi.
Aldaǵy bul qysqartý Amazon-nyń 30 jyldyq tarıhyndaǵy eń aýqymdysy bolǵaly tur. Salystyrý úshin aıtsaq, 2022 jyly kompanııa shamamen 27 myń jumys ornyn japqan edi. Qazan aıyndaǵy qysqartý tolqynyna ilikken qyzmetkerlerge Amazon ishinde nemese syrtynda jańa jumys tabý úshin 90 kún ýaqyt berilgen.
Buǵan deıin AQSh-ta Demokratııalyq partııa ókilderi adamdardy tehnologııamen almastyratyn kompanııalarǵa «robot salyǵyn» engizýdi usynyp júrgeni habarlanǵan. Sebebi, jasandy ıntellekt AQSh-ta 100 mıllıonǵa jýyq jumys ornyn almastyrýy múmkin degen qaýip bar.
Osyǵan deıin álemdegi eń iri onlaın-rıteılerlerdiń biri Amazon kompanııasy shamamen 30 myń korporatıvtik qyzmetkerin qysqartýdy josparlap otyrǵany týraly jazdyq.