Amazon men OpenAI 38 mıllıard dollar kóleminde kelisim jasasty
ASTANA. KAZINFORM — Amazon Web Services (AWS) pen OpenAI quny 38 mlrd dollar bolatyn uzaqmerzimdi strategııalyq kelisimge qol qoıdy. Bul kelisimshartta OpenAI-dy AWS ónimdiligi joǵary ınfraqurylymy arqyly jasandy ıntellekti atqaratyn jumys protsesterin iske asyrý men masshtabtaý úshin paıdalaný qarastyrylǵan. Bul týraly Amazon resmı saıtynda habarlandy.
Jańa kelisimshart 7 jylǵa eseptelgen ári bul seriktestik keıin uzartylýy da múmkin. Bul shart aıasynda OpenAI AWS-tiń myńdaǵan NVIDIA grafıkalyq protsessorlaryn quraıtyn esepteý resýrstaryna qol jetkizedi. Olar qajet bolǵan jaǵdaıda JI agenttik júktemesin jedel masshtabtaý úshin on mıllıondyq ortalyq protsessorge deıin ulǵaıa alady.
Kompanııanyń málimdeýinshe, AWS JI-ınfraqurylymyn iri kólemde qoldanatyn, joǵary qaýipsizdik, senimdilik pen ónimdilik deńgeıi bar tájirıbege ıe. Qazirgi kezde onyń klasterlerinde 500 000-nan astam chıp bar.
Jasandy ıntellekt tehnologııalarynyń qarqyndy damýy esepteý qýatyna buryn-sońdy bolmaǵan suranys týǵyzdy. Al aldyńǵy qatarly JI-modelderin usynatyn provaıderler óz júıelerin jańa deńgeıge kóterý úshin AWS-ke júginýi jıilep ketken. Bul seriktestik sheńberinde OpenAI-ǵa esepteý resýrstaryn paıdalaný ruqsaty tez arada beriledi. Barlyq josparlanǵan ınfraqurylym 2026 jyl sońyna deıin qoljetimdi bolady. Al 2027 jyldan bastap paıdalanylatyn ınfraqurylym aýqymy keńeıýi múmkin.
Klasterler ChatGPT suranystaryn óńdeýden bastap, jańa býyn modelderin oqytýǵa deıingi ártúrli jumys túrlerin qoldaı alatyndaı etip jobalanǵan. Sonymen qatar, olar aldaǵy OpenAI-dyń qajettilikterine saı ıkemdeletin etip jasalǵan.
— Aldyńǵy qatarly jasandy ıntellektini masshtabtaý úshin senimdi ári aýqymdy esepteý qýaty qajet — dedi OpenAI-nyń negizin qalaýshy jáne bas atqarýshy dırektory Sem Altman.
Buǵan deıin jasandy ıntellekt tehnologııasy boıynsha álem kóshbasshylarynyń biri — amerıkalyq OpenAI kompanııasy naryqtyq kapıtaldandyrý boıynsha mýltımıllıarder Ilon
Masktyń SpaceX kompanııasyn basyp ozyp, álemdegi eń baǵaly startap atanǵanyn jazǵan edik.
Kamıla Múlik