Amazon atom energetıkasyna bet burdy
ASTANA. KAZINFORM — Energııaǵa degen suranystyń kúrt ósýine baılanysty Amazon kompanııasy Calvert Cliffs atom elektr stantsııasyn basqaratyn Constellation Energy kompanııasymen 20 jyldyq kelisimge otyrdy. Bul týraly Vashıngtondaǵy Kazinform agenttiginiń tilshisi FOX Business basylymyna silteme jasap habarlaıdy.
Kelisim boıynsha Amazon-ǵa jyl saıyn 690 megavatt elektr qýaty jetkiziledi. Buǵan qosa, energetıkalyq ınfraqurylymdy damytýǵa 3 mıllıard dollardan astam qarjy jumsalmaq. Al atom elektr stantsııasynyń qýatyn taǵy shamamen 190 megavatqa arttyrý kózdelip otyr. Jobany 2030-2032 jyldar aralyǵynda aıaqtaý josparlanǵan.
Amazon men Constellation Energy kompanııalary 13 shtattaǵy Amazon nysandaryn qamtıtyn elektr energııasyn jetkizý týraly kelisimge de qol qoıdy. Bul Amazon-ǵa óńirdegi elektr shyǵynyn tıimdi basqarýǵa múmkindik beredi. Atalǵan kelisim tehnologııalyq kompanııalardyń derekter ortalyqtary men jasandy ıntellekt ınfraqurylymyn keńeıtýine baılanysty elektr energııasyna suranys kúrt artqan tusta jasaldy. Osyǵan baılanysty táýlik boıy turaqty qýat bere alatyn atom energetıkasyna korporatsııalardyń qyzyǵýshylyǵy artyp keledi.
Kalvert-Klıffs — Merılend shtatyndaǵy jalǵyz atom elektr stantsııasy. Onyń qýaty 1 790 megavatqa deıin jetedi. Bul 1,3 mıllıonnan astam úıdi elektr energııasymen qamtamasyz etýge jetkilikti. Kásiporynda 800-den astam adam eńbek etedi.
Buǵan deıin Atom salasynyń bolashaǵy týraly Astanada ǵalymdar men mamandar bas qosqanyn habarlaǵan bolatynbyz.
