Amazon 30 myń qyzmetkerin qysqartady
ASTANA. KAZINFORM – Álemdegi eń iri onlaın-rıteılerlerdiń biri Amazon kompanııasy shamamen 30 myń korporatıvtik qyzmetkerin qysqartýdy josparlap otyr. Bul sheshim pandemııa kezinde keńeıgen shtat kólemin ońtaılandyrý jáne shyǵyndardy azaıtý maqsatynda qabyldanǵan, dep habarlaıdy Reuters.
Qysqartý shamamen 350 myń adamnan turatyn korporatıvtik personaldyń 10 paıyzyn qamtıdy.
Al kompanııanyń jalpy qyzmetkerler sany álem boıynsha 1,55 mıllıon adamdy quraıdy. Bul 2022 jyldyń sońynan bergi eń aýqymdy qysqartý bolmaq, sol kezde Amazon 27 myń jumys ornyn qysqartqan edi.
Reuters dereginshe, qyzmetkerlerge qysqartý týraly habarlamalar jaqyn táýlikterde elektrondy poshta arqyly jiberiledi. Bul sharalar adam resýrstary (HR), operatsııalyq bólimder, qurylǵylar men servıster baǵyty jáne Amazon Web Services (AWS) sııaqty birneshe negizgi bólimshege áser etedi.
Amazon bas dırektory Endı Djessı sońǵy eki jylda kompanııa shyǵyndaryn azaıtý jáne korporatıvtik qurylymdy jeńildetý jóninde keshendi baǵdarlamany júzege asyryp keledi. Ol uıym ishindegi bıýrokratııa men basqarý satylarynyń tym kóptigin atap ótken. Kompanııada anonımdi keri baılanys júıesi iske qosylyp, onyń nátıjesinde 1,5 myńnan astam ótinish túsken jáne 450-den astam bıznes-protsesske túzetý engizilgen.
Endı Djessı maýsym aıynda korporatıvtik júıelerde jasandy ıntellektini keńinen qoldaný kadr sanyn odan ári azaıtýǵa alyp keletinin málimdegen. Ásirese qaıtalanatyn jáne rýtındik operatsııalardy avtomattandyrýǵa bolatyn salalarda qysqartý yqtımaldyǵy joǵary.
Buǵan deıin Amazon kompanııasy shamamen 600 myń jańa qyzmetkerdi jaldaý ornyna jasandy ıntellekt tehnologııalaryn engizý múmkindigin qarastyryp jatqany habarlanǵan bolatyn.
Layoffs.fyi platformasynyń dereginshe, 2025 jyldyń basynan beri álemdegi 200-den astam ІT-kompanııa shamamen 98 myń qyzmetkerin qysqartqan. Olardyń arasynda Microsoft (15 myń adam), Meta (JI bóliminen 600 adam), Google (qazan aıynda bultty qyzmetter bóliminen 100-den astam adam), sondaı-aq Salesforce (4 myń adam) jáne Intel (22 myń adam) bar.
Mamandardyń pikirinshe, jasandy ıntellektiniń qarqyndy damýy men naryqtaǵy jańa tehnologııalyq ózgerister iri korporatsııalardy kadrlyq saıasatty qaıta qaraýǵa ıtermelep otyr.