ÁMAT naryǵynda ónimsiz deldaldardy anyqtaıtyn jańa tártip engiziledi
ASTANA. KAZINFORM — Qazaqstanda áleýmettik mańyzy bar azyq-túlik taýarlary (ÁMAT) naryǵynda ónimsiz deldaldardy anyqtaýǵa múmkindik beretin jańa quqyqtyq tetik engiziledi. Bul týraly Ortalyq kommýnıkatsııalar qyzmetinde ótken brıfıngte QR Saýda jáne ıntegratsııa mınıstrligi Saýda komıtetiniń tóraǵasy Ernur Jaýtyqbaev málimdedi.
Onyń aıtýynsha, ishki saýda qaǵıdalaryna kóterme jetkizýshiler men bólshek saýda sýbektileriniń quqyqtyq mártebesin naqtylaıtyn ózgerister engizilýde.
— Bul ózgerister logıstıka, saýda jáne taýardy saqtaý barysynda naqty qosylǵan qun qalyptastyrmaıtyn ónimsiz deldaldardy anyqtap, olardy taýar ótkizý tizbeginen shyǵarýǵa múmkindik beredi, — dedi Ernur Jaýtyqbaev.
Sondaı-aq «Saýda qyzmetteri. Jalpy talaptar» ulttyq standartyna «áleýmettik mańyzy bar azyq-túlik taýarlarynyń ónimsiz deldaly» jáne «áleýmettik mańyzy bar azyq-túlik taýarlarynyń kóterme jetkizýshisi» uǵymdaryn engizý kózdelgen.
Buǵan qosa, zańnamada qalyptastyrylatyn qosylǵan qunnyń naqty bolýy jáne onyń naryq sýbektileriniń shyn máninde jumsaǵan shyǵyndarymen rastalýy jónindegi talap bekitiledi.
Komıtet tóraǵasynyń aıtýynsha, otandyq óndirýshilerdi qoldaý maqsatynda saýda jelilerindegi árbir taýar sanaty men kishi sanatta qazaqstandyq ónimniń jetkilikti kólemde usynylýyn mindetteıtin ózgerister de ázirlenip jatyr.
Eske salaıyq, buǵan deıin áleýmettik mańyzy bar azyq-túlik taýarlarynyń tizimi keńeıtilgenin jazdyq.
