Amanjol Áltaı «Qaladan — aýylǵa» atty baǵdarlamany qolǵa alýdy usyndy

ASTANA. KAZINFORM — Májilis depýtaty Amanjol Áltaı jastardy aýylda turaqtandyrý úshin «Qaladan — aýylǵa» atty baǵdarlamany qolǵa alýdy usyndy.

— «Qaladan — aýylǵa» degen baǵdarlama kerek bizge. Jastardy qaladan aýyl tartý úshin ne isteý kerek? Osynyń bir strategııalyq uzaq merzimdi josparyn jasaýymyz qajet. Árıne, jastar barý úshin eń birinshi baspana máselesin sheshý kerek. Qazir aýyldaǵy kópbalaly analar sekildi arnaıy sanattardy memleket esebinen baspanamen qamtý tájirıbesi bar. Ol durys. Endi bizge aýylǵa kóship barǵan nemese aýyldaǵy jas mamandardy baspanamen qamtýdyń joldaryn qaraǵan durys, — dedi depýtat Májilistegi dóńgelek ústelde.

Amanjol Áltaı aýyldardaǵy medıtsınalyq mekemelerdi tehnıkamen jabdyqtaý máselesinde alalaý bar ekenin atap ótti.

— Aýyldy kemsitý bar bizde. Oǵan birneshe dálel aıtýǵa bolady. Mysaly, Densaýlyq saqtaý salasynda «jedel járdem» kólikteri birinshi oblysqa bólinedi. Oblystan sál eskirgenderin aýdandarǵa beredi. Aýdandar ábden júrýge jaramaı qalǵan, anaý keńes zamanyndaǵy, «metallolom» bolyp qalǵan kólikterdi kózaldaý qylyp aýyldarǵa beredi. Qaı aýylǵa barsańyz da, dárigerler naýqasty aýdan ortalyǵyna jetkize almaı jantalasyp júrgenin kóresizder, — dedi Májilis depýtaty.

Ulttyq ekonomıka mınıstrliginiń deregi boıynsha, keıingi on jylda Qazaqstan kartasynan 572 aýyl joıylǵan.