Amantaı Shárip «Alash» ınstıtýtynyń dırektory bolyp taǵaıyndaldy
ASTANA. 16 naýryz. QazAqparat - L.N. Gýmılev atyndaǵy Eýrazııa ulttyq ýnıversıteti rektorynyń buıryǵymen belgili pýblıtsıst,
ádebıettanýshy ǵalym Amantaı Shárip atalmysh oqý orny janyndaǵy «Alash» mádenıet jáne rýhanı damý ınstıtýtynyń dırektory bolyp taǵaıyndaldy. Bul týraly JOO-nyń baspasóz qyzmetinen habarlady.
A.Shárip «Daryn» memlekettik jastar syılyǵynyń laýreaty. Elimizdiń birqatar joǵary oqý oryndary men buqaralyq aqparat quraldarynda qyzmet istedi. Buǵan deıin «Astana aqshamy» gazetiniń bas redaktory boldy.
EUÝ Ǵylymı keńesi men QR BǴM Ǵylym komıtetiniń sheshimi negizinde 2006 jyly qazan aıynda qurylǵan «Alash» mádenıet jáne rýhanı damý ınstıtýty osy ýaqytqa deıin professor, alashtanýshy ǵalym Dıhan Qamzabekulynyń jetekshiligimen 17 ǵylymı jınaq, túsindirme sózdik, oqý quralyn jarııalady. Bulardyń ishinde «Jádıtshildik jáne Alash», «Eski ádebı tildiń túsindirme sózdigi», «Eýrazııa mádenıetiniń sózdigi» atty eńbekter men frantsýz, aǵylshyn aýdıtorııasyna arnalǵan Alash murasy negizindegi «Qazaq tili» oqý quraldary bar. Bes jylda «Alash» ınstıtýty 34 halyqaralyq, respýblıkalyq ǵylymı konferentsııa, dóńgelek ústel, semınar ótkizip, otandyq jáne sheteldik basylymdarda kórnekti ult zııalylaryna qatysty 200-ge tarta maqala basyp shyǵardy.
«Alash» ınstıtýty Haıretdın Bolǵanbaı, Sadýaqas Ǵylmanı murasyn tuńǵysh ret kitap etip jarııalady. Bul ǵylym ujymy 2012 jyldyń qańtarynan tanymal dintanýshy S.Ǵylmanıdyń 7 tomdyq «Qazaqsha-arabsha sózdigi» men nemis ǵalymy M.Kýchınskııdiń 1924 jylǵy «Dala jáne onyń halqy» atty Alash zııalylarynyń kómegimen ázirlegen eńbegin baspaǵa daıarlaý jumysyn bastap ta ketti.
Instıtýttyń ǵylymı jobalaryna Serik Qırabaev, Sultanhan Aqqulyuly, Serik Negımov, Baýyrjan Omaruly, Darhan Qydyráli, Serikkúl Sátenova, Zııabek Qabyldınov, Samal Tóleýbaeva, Bekjan Ábdiýálıuly syndy ǵalymdar turaqty atsalysyp keledi.
