Amankeldi Taspıhovtyń senimdi ókilderi aq halatty abzal jandarmen kezdesti
Kezdesýge 100-ge jýyq medıtsına qyzmetkeri qatysty. Jıynda A.Taspıhovtyń senimdi ókilderi - respýblıkalyq qoǵamdyq shtabynyń teń tóraǵasy S.Dáýletalın, QR Kásipodaqtar federatsııasy Aqparattyq-taldaý ortalyǵynyń dırektory S.Muqashev, Nur-Sultan qalalyq kásipodaqtar ortalyǵynyń tóraǵasy T.Esentaev, «Senim» densaýlyq saqtaý júıesi jumyskerleriniń salalyq kásipodaǵynyń tóraǵasy S.Dúısenov, «Senim» densaýlyq saqtaý júıesi jumyskerleriniń salalyq kásipodaǵy qalalyq fılıalynyń tóraıymy G.Qulqaeva boldy.
Eń aldymen kandıdattyń senimdi ókilderi elimizdiń densaýlyq saqtaý salasynyń qyzmetkerlerin - halyqaralyq medbıkeler kúnimen quttyqtaýdan bastady.
A.Taspıhovtyń respýblıkalyq qoǵamdyq shtabynyń teń tóraǵasy S.Dáýletalın kandıdattyń eńbek joly men adamgershilik tulǵasy jóninde baıandap, saılaýaldy tuǵyrnamasymen tanystyrdy. Ol kandıdattyń tuǵyrnamasynda eńbek adamynyń quqy men múddesin qorǵaýǵa qatysty máselelerge basymdyq berilgenin, ásirese, josyqsyz jumys berýshilerdiń jaýapkershiligin arttyrý, eńbek qaýipsizdigi, laıyqty eńbekaqy men ujymdyq sharttyń mańyzdylyǵy qarastyrylǵanyn aıta kele, kásipodaqtardyń ustanyp otyrǵan baǵyt-baǵdary men naqty qadamdary saılaýshylar tarapynan qoldaý tabatynyna nıet bildirdi.
Sondaı-aq, «Senim» densaýlyq saqtaý júıesi jumyskerleriniń salalyq kásipodaǵynyń tóraǵasy S.Dúısenov:
«Búgingi tańda Qazaqstannyń aýyldyq jerlerinde densaýlyq saqtaý júıesin damytý mańyzdy. Kásipodaqtar tarapynan aýyldyq eldi mekenderde qyzmet etetin jas mamandarǵa áleýmettik qoldaý kórsetýge erekshe mán berilip otyr. Bıyl «SENIM» salalyq kásipodaǵy aýdandyq medıtsınalyq mekemelerge qajetti jas mamandardy yntalandyrý maqsatynda 500 000 teńgeniń sertıfıkatyn bere bastady», - dep atap ótti.
Kezdesýde saılaýshylar ózderin tolǵandyrǵan suraqtardy qoıyp, pikirlerin bildirdi.
