Amangeldi Ótepov «Street Workout» sportynan Atyraý chempıony atandy
ATYRAÝ. QazAqparat - 1 mamyr men 1 maýsym aralyǵynda Atyraý qalasynda «Street Workout» sportynan qala birinshiligi ótti. Saıysqa jalpy sany 100-den astam qala turǵyny qatysty, - dep habarlaıdy QazAqparat tilshisi.
Atyraý oblysy dene shynyqtyrý jáne sport basqarmasynyń baspasóz qyzmeti habarlaǵandaı, «Street Workout» sporty buryn Atyraý qalasy úshin tańsyq bolatyn. Byltyrǵy jyly Ulttyq Olımpıada komıtetiniń bastamasymen birneshe alańqaılar qoldanysqa berildi. Qalalyq sport bólimi men Buqaralyq sportty damytý ortalyǵy «Street Workout» sportyn damytý maqsatynda jastardyń basyn biriktirip, úlken chempıonat uıymdastyrdy.
Bir aıǵa sozylǵan básekeniń aqtyq saıysynda iriktelgen 20 sportshy ózara úzdikti anyqtady. Úsh jattyǵý boıynsha 70 upaı jınap qarsylastarynan myqty ekenin dáleldegen Amangeldi Ótepov qala chempıony degen ataqqa ıe boldy. Ekinshi oryn ıelengen Saıd Tıpaev 60 upaı enshiledi. Úshinshi orynda 52 upaımen Oljas Shyńǵalıev tur.
Jarys jeńimpazdary men júldegerlerine qarjylaı syıaqy men Kýbok tabys etildi. Atalǵan úsh sportshymyz Qazaqstan chempıonatynda oblys namysyn qorǵaıtyn bolady.
1 maýsym Halyqaralyq balalardy qorǵaý kúnine tuspa-tus kelgen saıysqa kishkentaı búldirshinder de qatysty. Olarǵa merekege oraı túrli sporttyq jabdyqtar syıǵa berildi.
Aıta keteıik, «Street Workout» sportynyń Qazaqstandaǵy bas jattyqtyrýshysy Aıtym Jakýpov saıysty tamashalaýǵa arnaıy keldi.
Aldaǵy ýaqytta Atyraý oblysynda osy bir sport túrin kásibı túrde damytýdy qolǵa alatynyn aıtyp ótti.
