Amangeldi Aıtaly: Ulttyq qundylyqty nasıhattaý - órkenıet qundylyqtarynan bas tartý emes
AQTÓBE. QazAqparat - Qoǵam qaıratkeri Amangeldi Aıtaly Elbasy Nursultan Nazarbaevtyń baspasózde jaryq kórgen «Bolashaqqa baǵdar: rýhanı jańǵyrý» atty maqalasyna óz oıyn bildirdi, dep habarlaıdy QazAqparat tilshisi.
«Búgingi jahandaný zamanynda kóptegen memleketter ulttyq qundylyqtaryna alańdap otyr. Aǵylshyn tiliniń qýaty, álemdik buqaralyq aqparat quraldarynyń tasqyny ósip turǵan jaǵdaıda eldiń ulttyq qundylyǵy, onyń taǵdyry qalaı bolady degen másele kóptegen memleketti mazalaıdy. Sonyń biri - biz. Qundylyqtar degenimiz ultty ult etetin qasıetter. Prezıdent óz maqalasynda ulttyq rýhanı kod týraly jazdy. Bul «qazaqty qazaq etetin qandaı qundylyqtar, qandaı mádenıettiń baǵyttary» degen sóz. Biz tek tamaǵymyzdyń toqtyǵyna máz bolmaı, rýhymyzdyń kúshtiligine, qadyr-qasıetimizdiń moldyǵyna búgin mán berýimiz kerek. Onyń barlyǵy adamǵa kelip tireledi. Adamǵa tek jumys kúshi, materıaldyq óndiristi, ıgilikterdi shyǵaratyn tulǵa dep emes, qoǵamnyń mańyzdy kúshi, rýhy bıik tulǵa, rýhy bıik qazaq, rýhy bıik Qazaqstan memleketiniń azamaty dep qaraýymyz kerek. Osy rýhty qalaı, qandaı jolmen tárbıeleımiz dep Prezıdent halyqpen aqyldasyp, óz oıymen bólisip otyr. Negizge máni osynda»,- dedi qoǵam qaıratkeri Amangeldi Aıtaly.
Fılosofııa ǵylymdarynyń doktory, professor Amangeldi Aıtaly álemdik jahandaný kezinde qazaqty ult retinde saqtap qalatyn birneshe faktorǵa toqtaldy.
«Birinshiden, qazaqtyń tili, ekinshiden, qazaqtyń musylmandyǵy men dástúri, qazaqtyń mol rýhanı baılyǵy. Sol rýhanı baılyqty, qundylyqty qazaqtyń boıyna darytý kerek. Biraq ulttyq qundylyqtarymyzdy qurmetteımiz dep eskiniń bárin nasıhattaı berýdiń qajeti joq. Bizdiń kádemizge jaraıtynyn alamyz. Ulttyq qundylyqty nasıhattaımyz dep álemdik órkenıet qundylyqtarynan bas tartpaımyz. Ekijaqty da belgili bir balansta ustap, elimizdiń mádenıetin, rýhanı baǵytyn ustaı bilýimiz kerek dep oılaımyn. Bul týraly osy ýaqytqa deıin aıtyldy. «Mádenı mura» baǵdarlamasy boldy, birqatar sharalar jasaldy»,- dedi Amangeldi Aıtaly.
