Amangeldi Aıtaly: Kórisý - musylmandyqty qabyldamastan buryn paıda bolǵan Túrki mádenıeti
Kórisý kúni merekesine oraı aǵa býyn ókilderi, eńbek ardagerleri men aıaýly ájelerge arnaıy syılyqtar tapsyrylyp, qurmet jasaldy. Aımaq basshysy Ońdasyn Orazalınniń arnaıy tapsyrmasymen oblystyq máslıhat hatshysy Amangeldi Nuǵmanov, oblys ákiminiń orynbasary Bulbul Eleýsinova, qala ákimi Ashat Shaharov memleket jáne qoǵam qaıratkeri, ǵalym-ustaz Amangeldi Aıtaly, tarıhshy ǵalym, professor Zákiratdın Baıdosov, oqý-aǵartý isiniń úzdigi Qarakóz Qosaeva, eńbek ardageri Berikov Nıetjan syndy zııaly qaýym ókilderiniń úıine baryp quttyqtap shyqty.
«Kórisý - ǵalymdardyń aıtýy boıynsha musylmandyqty qabyldamastan buryn paıda bolǵan Túrki mádenıeti. Elimizdiń yrys-yntymaǵyn arttyratyn aıryqsha meıram. Adamdar bul kúni arasyndaǵy burynǵy ókpe-renishin keshirip, arazdyqty umytyp, bir-birine amandyq-saýlyq tileıdi. «Kóktemge aman-esen jettik« dep dastarhan jaıyp, úlkenderge sálem berip, quttyqtap jatady. Memleket basshysy Q.Toqaev «Táýelsizdik bárinen qymbat» atty maqalasynda Naýryz meıramynyń mazmunyn odan ári baıytý keregin aıtqan edi. Osy rette, ulttyq qundylyqtarymyz ben salt-dástúrlerimizdi jańǵyrtýdyń mańyzy óte zor. Barsha aǵaıyndy Kórisý kúnimen shyn júrekten quttyqtaımyn» - dep atap ótti belgili ǵalym Amangeldi Aıtaly.
Ardagerler oblys ákiminiń mereıli mereke qarsańynda aǵa býyn ókilderin umytpaı, arnaıy quttyqtap, jyly lebizin arnaǵanyna jáne syılyqtar tabys etkenine óz alǵysyn bildirdi.
