Amangeldi Kúlimbetov: Balalar otorınolarıngologııasyn damytý – basty mindetimiz
ASTANA. KAZINFORM – Búgin Aqordada Memleket basshysy Qasym-Jomart Toqaev Medıtsına qyzmetkerleri kúnine oraı densaýlyq saqtaý salasynyń úzdikterin marapattady. Olardyń qatarynda S.Asfendııarov atyndaǵy Qazaq ulttyq medıtsına ýnıversıtetiniń professory, medıtsına ǵylymdarynyń doktory Amangeldi Kúlimbetov te bar.
Otorınolarıngologııa, allergologııa jáne ımmýnologııa salalarynda ǵylymı zertteýler júrgizip, otandyq medıtsına ǵylymy men bilim berý isiniń damýyna eleýli úles qosqan joǵary sanatty dáriger «Qurmet» ordenimen marapattaldy.
Ǵalym bul salaǵa jarty ǵasyrǵa jýyq ǵumyryn arnaǵan. Ol 1974 jyly Almaty memlekettik medıtsına ınstıtýtynyń pedıatrııa fakýltetine túsip, stýdenttik kezinen-aq ǵylymı izdeniske den qoıǵan.
– Eńbek jolyn birinshi qalalyq balalar klınıkalyq aýrýhanasynyń qabyldaý bólimshesinen bastadym. Keıin Densaýlyq saqtaý mınıstriniń kómekshisi bolyp qyzmet atqardym. 1987 jyly Máskeýdegi Pedıatrııa ǵylymı-zertteý ınstıtýtynyń aspırantýrasyna túsip, balalardyń qulaq, muryn, tamaq aýrýlaryn zertteýmen aınalystym, – deıdi ǵalym.
Professor Amangeldi Kúlimbetov — otandyq medıtsına ǵylymynda ózindik qoltańbasy bar tulǵa. Ol Qazaqstanda balalar otorınolarıngologııasy (LOR) baǵyty boıynsha alǵash ret memlekettik tilde doktorlyq dıssertatsııa qorǵaǵan ǵalym. Sondaı-aq «Joǵary oqý ornynyń úzdik oqytýshysy» atanyp, oqý ornynyń «Altyn qoryna» engen.
Búginde tájirıbeli ustazdy alańdatatyn basty másele — balalarǵa arnalǵan LOR kómeginiń klınıkalyq bazalaryn nyǵaıtý jáne jas mamandardy daıarlaý.
— Bizdiń kafedra 1934 jyly qurylǵan, ol — otandyq medıtsınalyq joǵary oqý oryndary arasyndaǵy eń kóne ári jetekshi ortalyqtardyń biri. Qazir men balalar otorınolarıngologııasy boıynsha kásibı standarttar men rezıdentýranyń eki jyldyq bilim berý baǵdarlamalaryn ázirleýge qatysyp júrmin. Bul salada yntalandyrýdy kúsheıtip, jas mamandarǵa qoldaý kórsetý qajet, — dedi ol.
Ǵalym Aqordada alǵan joǵary marapatyn búkil otandyq densaýlyq saqtaý salasyna kórsetilgen qurmet dep sanaıdy.
— Búgingi marapat — men úshin zor mártebe. Prezıdent qolynan mundaı nagradany alý kez kelgenniń peshenesine jazyla bermeıdi. Qýanyshymdy sózben jetkizý qıyn. Qazir elimizdiń túkpir-túkpirinen, tipti sheteldegi áriptesterimnen quttyqtaýlar kelip jatyr. Bul marapat maǵan jańa serpin berdi. Aldaǵy ýaqytta da balalar densaýlyǵy úshin aıanbaı eńbek ete beremin, - dep túıindedi Amangeldi Kúlimbetov.
Aıta keteıik, búgin elordada Prezıdent Qasym-Jomart Toqaev Medıtsına qyzmetkerleri kúnine oraı densaýlyq saqtaý salasynyń qyzmetkerlerin marapattady.
