Amandyq Batalovtyń kólik júrgizýshisi baspanasyn ákimdikke qaıtardy

TALDYQORǴAN. QazAqparat - Almaty oblysynyń buryńǵy ákimi Amandyq Batalovtyń kólik júrgizýshisine berilgen páter memleketke qaıtaryldy. Taldyqorǵan ákimdigi Amandyq Ǵabbasulynyń kólik júrgizýshisi bolǵan azamat baspanany óz erkimen ótkizdi dep túsindirdi, - dep habarlaıdy QazAqparat tilshisi.

Aıta keteıik, qazir Taldyqorǵanda baspanaǵa qatysty daý ýshyǵyp tur. Qalaǵa bıyl jańadan ákim bolyp kelgen Áset Masabaev jumysyn shahardaǵy úılerdiń zańdy, zańsyz berilgendigin tekserýmen bastaǵan bolatyn.

Anyqtalǵandaı oblys ortalyǵynda 1062 páter zań buzýshylyqpen berilgen. Endi turǵyndar úıdi zańdy alǵanyn sot arqyly dáleldep shyqpasa, baspanany májbúrli túrde bosatatyn bolady. Qazirdiń ózinde 37 baspana ákimdiktiń balansyna qaıta qaıtaryldy.

Jalpy, Taldyqorǵanda 16 myńnan asa adam úı kezeginde tur. Olardyń ishinde de kezek alǵa emes, kerisinshe artqa jyljyp jatyr dep shaǵymdanǵandar az emes.

«Qazirgi tańda óz erkimen Almaty oblysynyń burynǵy ákiminiń júrgizýshisi Nıkolaı bir páterli bólmesin Taldyqorǵan qalasynyń turǵyn úı qoryna qaıtaryp berdi. Endi osy baspana kezekke sáıkes áleýmettik osal toptarǵa beriletin bolady»,- dedi Taldyqorǵan qalasy ákimi baspasóz qyzmetiniń hatshysy Mádı Shákenov.