Amandyq Batalov Úkimet basshysyna ótinish jasady
TALDYQORǴAN. QazAqparat - Taldyqorǵanǵa jumys saparymen kelgen Premer-Mınıstrge Almaty oblysynyń ákimi Amandyq Batalov baspana máselesi boıynsha ótinishin bildirdi, dep habarlaıdy QazAqparat tilshisi.
Úkimet basshyna oblys ákiminiń birinshi orynbasary Lıazzat Turlashov baıan etkendeı, bıyl óńirde 784 myń sharshy metr baspana paıdalanýǵa beriledi.
«Bıyl 784 myń sharshy metr baspanany salamyz. «Nurly jer» baǵdarlamasy boıynsha 19 mlrd 100 mln teńge qarajat bólingen. Sonyń ishinde kredıttik úı 42 myń sharshy metr bolady. Sonymen qatar, qosymsha 2,8 mlrd teńgege 8 kópqabatty úıdi kópbalaly otbasylarǵa salamyz», - dedi Lázzat Turlashov.
Osy sátte Almaty oblysynyń ákimi Amandyq Batalov Úkimet basshysyna óz ótinishin bildirdi.
«Asqar Uzaqbaıuly, jalǵa beriletin arendalyq turǵyn úılerdiń sanyn arttyrý jóninde ótinishimdi bildiremin. Sebebi, baspana kezeginde turǵandar sany óte kóp. Bizde jobalyq-smetalyq qujattar daıyn», - dedi Almaty oblysynyń ákimi Amandyq Batalov Úkimet basshysy Asqar Mamınge qarata aıtqan sózinde.
Esterińizge sala keteıik, búgin Premer-Mınıstr Almaty oblysyna jumys saparymen keldi. Aldymen Asqar Mamın Qazaqstan-Qytaı shekarasynda taýar aınalymyn ulǵaıtýǵa, QR tranzıttik áleýetin arttyrýǵa baǵyttalǵan Ortalyq Azııadaǵy asa iri «Nur joly» ótkizý pýnkti jáne «Qorǵas - Shyǵys qaqpasy» AEA qurǵaq portynyń jáne ózge de nysandardyń jumysymen tanysty.
