Amandyq Batalov Taldyqorǵanda salynǵan qandaı nysandardy maqtan tutatynyn aıtty
NUR-SULTAN. QazAqparat – Almaty oblysynyń ákimi Amandyq Batalov Taldyqorǵan qalasynda salynǵan qandaı nysandardy maqtan tutatyndyǵyn aıtyp berdi, dep habarlaıdy QazAqparat tilshisi.
«Men árbir nysandy maqtan tutamyn. «Mynaý keremet» dep bólip-jara almaımyn. Nysan salarda bıýdjet qarajaty jumsalatyndyqtan mindetti túrde kelisý qajet. Oblys ortalyǵynda durys teatr ǵımaraty bolmady. Óte tanymal Bıken Rımova atyndaǵy teatr bar. Onda óte talantty akterlar eńbek etedi. Men solarǵa qolaıly jaǵdaı jasaýǵa tyrysyp, jańa teatrdyń jobasyn jasatyp salǵyzdym. Teatrdaǵy eń bastysy - akýstıka. Taıaýda Asanáli Áshimov kelip, mundaı akýstıkanyń Qazaqstanda joq ekendigin aıtty. Nege maqtanbasqa?! Ekinshisi – Saltanat saraıy. Bári neke saraıy dep jatady. Ol neke saraıy emes. Onyń keremet zaly bar. Almaty oblysy - shekara mańyndaǵy óńir. Eger Memleket basshysy osy jerde qandaı da bir memleketaralyq kezdesý ótkizgisi kelse, ondaı oryn Taldyqorǵanda bolǵan emes. Biz sony barlyq jaǵdaıyn kelistire otyryp saldyq», - dedi Amandyq Batalov «Habar» telearnasyndaǵy «Ulttyq múdde» baǵdarlamasyna bergen suhbatynda.
Sonymen qatar ol oblys ortalyǵynda salynǵan Oqýshylar saraıyn da maqtan tutatyndyǵyn basa aıtty.
«Bizdiń teatrdyń jobasymen dál sondaı mádenı nysan Túrkistanda salyndy. Oqýshylar saraıy jobasyna Soltústik Qazaqstan oblysy qyzyǵýshylyq tanytyp, Petropavlda ǵımarat boı kóterdi. Al Jastar saraıymyzdyń úlgisimen Qyzylordada nysan salynǵan bolatyn. Taldyqorǵan nysandarynyń jobasy ózge óńirlerge taralyp jatyr», dedi oblys basshysy.
Amandyq Batalov Taldyqorǵan qalasynyń basty alańyna tóselgen Arqarly granıt tastaryn da maqtan tutatyndyǵyna nazar aýdartty.
«Granıtimiz óte ádemi. Jańbyr jaýǵan kezde terezeden syrtqa kóz salynyp, alańǵa súısine qaraımyn. Alańdaǵa tastar myńdaǵan jylǵa shydaıdy. Ony eshteńe búldire almaıdy. Tipti, tankimen de júrýge bolady», - dedi ol.
