Amandyq Batalov «Rýhanı jańǵyrý» aıasyndaǵy jumystardy kúsheıtýdi tapsyrdy

ASTANA. QazAqparat - Búgin Almaty oblysynyń ákimi Amandyq Batalov óńirlerdiń áleýmettik-ekonomıkalyq damýy men memlekettik baǵdarlamalardy júzege asyrý máseleleri boıynsha Memleket basshysy Nursultan Nazarbaevtyń tóraǵalyǵymen ótken keńeste talqylanǵan baǵyttar boıynsha otyrys ótkizdi, dep habarlaıdy QazAqparat óńir basshysynyń baspasóz qyzmetine silteme jasap.

Amandyq Batalov jıyn barysynda aýdan jáne qala ákimderine, oblystyq basqarmalar men departamentterdiń basshylaryna birqatar tapsyrmalar júktedi.

«Bıylǵy jyldyń ótken jeti aıynyń áleýmettik-ekonomıkalyq damý qorytyndysy shyǵaryldy. Bizdiń aldymyzda birneshe mańyzdy tapsyrma tur. Memlekettik «Nurly jer» jáne «Nurly jol» baǵdarlamalarynyń oryndalýy Elbasynyń erekshe baqylaýynda. Sol sebepti, osy jáne ózge de baǵyttar boıynsha jumystardy qarqyndy júrgizý qajet. Memlekettik-jekemenshik seriktestik mehanızmderin qoldaný máselesindegi, sonyń ishinde densaýlyq saqtaý salasynda osy mehanızmdi qoldanýda belsendi jumystar júrgizýimiz kerek. Óńirge ınvestıtsııa tartý da erekshe nazarda. Sondyqtan da, aýdan, qala ákimderi men basqarma jáne departament basshylaryna osy atalǵan tapsyrmalardy oryndaýda úlken jaýapkershilik tanytýdy suraımyn. Atalǵan baǵyttardyń oryndalýy árqaısyńyzdyń atqarǵan jumystaryńyzdyń  aıqyn kórsetkishi bolyp tabylady», - dedi óńir basshysy.

Jıyn barysynda oblys ákimi «Rýhanı jańǵyrý» baǵdarlamasyn oryndaýǵa erekshe nazar aýdarý qajettigin de atap ótti.

Amandyq Ǵabbasuly oblystyq ishki saıasat basqarmasynyń basshysy men osy salaǵa jetekshilik etetin ákim orynbasaryna: «Oblysta «Rýhanı jańǵyrý» baǵdarlamasyn iske asyrý baǵytynda qolǵa alynǵan jumystardy kúsheıtý qajet. Bizde kóp múmkinshilikter bar, alaıda belsendilik tanytý jaǵy aqsap tur. Іstelip jatqan jumystaryńyzda naqtylyq baıqalmaıdy. Jańasha kózqaraspen qarap, tıistı sharalar qabyldańyzdar, - deı kele, «Rýhanı jańǵyrý» baǵdarlamasyn júzege asyrý maqsatynda arnaıy ashylǵan Taldyqorǵan qalasyndaǵy oblystyq  jobalyq keńse jumysyn qaıta qarap shyǵýdy tapsyrdy.