Amandyq Batalov kómirge barǵan áıel nege júk tıegishke minip alǵanyn aıtty
«Saryózekte áıel adamnyń júk tıegishtiń kúregine minip alǵan vıdeoǵa toqtalsam, keıinnen bul jaǵdaıdy «Almaty oblysynda kómir tapshylyǵynan adamdar osyndaıǵa baryp jatyr» dep taratty. Osy oqıǵanyń mán-jaıyn egjeı-tegjeıli anyqtadym. Atalǵan áıel ol jerde burynnan jumys isteıdi eken, bıznespen aınalysady. Onyń úsh júk kóligi bar jáne sol jerden alǵan kómirge aqshany ústemelep qosyp, turǵyndarǵa qaıta satady», - dedi A. Batalov Ortalyq kommýnıkatsııalar qyzmetinde.
Osy oraıda ol salyq organdary men polıtsııaǵa tıisti tapsyrma bergenin aıtty. Olar kómirdi alyp-satýmen aınalasyp, osylaı tabys jasap júr.
«Nátıjesinde, kómir tapshy dep kórsetti. Sol kúni bizde 10 vagon júkti túsirýge keldi, al 20-sy jaqyndap qalǵan edi. Bizde ár vagon nómirlengen, ákimdik adamdary ony erekshe baqylaýda ustap tur», - dedi oblys ákimi.
Eske sala keteıik, bıyl qazan aıynyń sońynda Almaty oblysynda kómir alý úshin kóliktiń frontaldy júk tıegishtiń kúregine minip alǵan áıeldiń áreketine ákimdik túsinik berdi. Kerbulaq aýdanyndaǵy Saryózek aýylynyń turǵyny kómirge alýǵa kelip júk tıegishtiń kúregine minip alǵan áıeldiń vıdeosy jelige taraǵan bolatyn. Ol kómirdi júk kóliginiń bortyna tógip jatqanda da tıegishten túspegen.
