Amandyq Batalov qashan zeınetke shyǵady – ákimniń jaýaby
NUR-SULTAN. QazAqparat – Almaty oblysynyń ákimi Amandyq Batalov Ortalyq kommýnıkatsııalar qyzmetindegi brıfıngte «Zeınetke shyǵýǵa daıynsyz ba?» degen suraqqa jaýap berdi , dep habarlaıdy QazAqparat.
«Maǵan da osy suraq jıi qoıylady. Memleket basshysy osy laýazymdy maǵan senip tapsyrǵasyn, oǵan meniń kúshim de, densaýlyǵym da jetedi. Men únemi jastarǵa, qaramaǵymdaǵy balalaryma aıtamyn: erteń saǵat 12-de jumystan ketesiń dese, men sol 12-ge deıin bul júktemeni adal ári jaýapty túrde alyp júremin, halyq úshin jumys isteımin jáne Memleket basshysynyń tapsyrmalaryn oryndaımyn. Boldy. Al qashan ketetinim: erteń be, arǵy kúni me, bir jyldan keıin be, kerek adam ózi oılanyp, boljamdaryn jasaı bersin», - dep jaýap berdi Amandyq Batalov.
Oblys ákimi árbir berilgen múmkindik arqyly adamdar úshin, oblys úshin qyzmet etip, óz tájirıbesin jastarǵa berýge tyrysatynyn atap ótti.
«Jumys óte kóp. Bul jumystan tek jaqsy ister jasaǵanda ǵana lázzat alasyń», - deıdi Amandyq Batalov.
Eske sala keteıik, búgin QR Prezıdenti janyndaǵy Ortalyq kommýnıkatsııalar qyzmetinde «Memleket basshysynyń tapsyrmasy aıasynda Almaty oblysynyń áleýmettik-ekonomıkalyq damýy týraly» onlaın baspasóz konferentsııasy ótip jatyr.
