Amandyq Batalov bastaǵan delegatsııa Shyǵys Qazaqstan oblysyna bardy
TALDYQORǴAN.QazAqparat - Búgin Almaty oblysynyń ákimi Amandyq Batalov bastaǵan delegatsııa Shyǵys Qazaqstan oblysyna bardy, dep habarlaıdy QazAqparat tilshisi.
Jetisýlyq delegatsııanyń birinshi toqtaǵan nysany - Óskemen qalasyndaǵy Olga Rypakova atyndaǵy jeńil atletıka ortalyǵy. Bul nysan 2014 jyly paıdalanýǵa berilgen. Ortalyqta ártúrli qashyqtyqqa júgirý alańdary men túrli ádispen sekirýge arnalǵan alańdar bar. Búgingi kúni munda 426 adam sportpen shuǵyldanýda. Olarǵa 19 jattyqtyrýshy qyzmet etedi.
Osydan keıin jetisýlyqtar ShQO ońaltý ortalyǵyna at basyn burdy. Munda naýqastarǵa kardıologııalyq, nevrologııalyq, ortopedııalyq ońaltý qyzmetin kórsetedi. Sondaı-aq qonaqtar Óskemende boı kóterip kele jatqan «Nurly jol» saıabaǵyna da baryp, nysannyń sáýlet jobasymen tanysty.
Almaty oblysynyń Shyǵys Qazaqstan oblysyndaǵy kúnderi aıasynda Óskemendegi oblystyq drama teatrynda Almaty oblystyq Súıinbaı atyndaǵy fılarmonııasy, «Adyrna» folklorlyq-etnografııalyq ansambli men «Altynaı» memlekettik halyqtyq bı ujymdary «Jer jannaty Jetisýdan altyn Altaıǵa» atty mazmundy kontserttik baǵdarlamasyn usyndy.Jınalǵandar ónerpazdardyń ónerin joǵary baǵalady.
Aıta ketý kerek, Almaty oblysynyń ShQO-ǵa saparynyń basty maqsaty - mańyzdy óndiristik jáne sporttyq nysandardyń qurylymymen tanysý, tájirıbe almasý, saýda, bıznes jáne mádenıet salalary boıynsha yntymaqtastyq baılanystardy nyǵaıtý.
